Ադրբեջանական ԽՍՀ-ից փախստականների համագումարի համակարգող Մարիամ Ավագյանի համոզմամբ, քանի դեռ չի գնահատվում 1988-1992թթ. Ադրբեջանական ԽՍՀ-ի տարածքում հայերի նկատմամբ տեղի ունեցած ցեղասպանությունը, քանի դեռ չի խոսվում, որ ցեղասպանության արդյունքում 660 հազարից ավելի հայեր դարձան փախստական, կորցրին հայրենիք, մեր տարածաշրջանում խաղաղություն չի լինելու, մեր զինվորները սահմանին շարունակելու են զոհվել:
«Ստեղծված իրականությունն այնպիսին է, և ողջ միջազգային քաղաքականությունը կառուցվում է այն մեծ կեղծիքի վրա, որ 1992 թվականին ագրեսոր Հայաստանը հարձակվել է Ադրբեջանի վրա, խախտել նրա տարածքային ամբողջականությունը, օկուպացրել է տարածք, և այսօր օկուպացված տարածքների սահմանները պահպանող հայ զինվորը օկուպանտ է, և ուրեմն պետք է հարձակվել այդ օկուպացված տարածքները հետ բերելու համար, ուստի պատերազմը շարունակվում է: Քանի դեռ ադրբեջանական մեծ կեղծիքը, թե հայերն են օկուպացրել Արցախը, փաստերով չի հերքվել միջազգային ամբիոններից, և արդեն 21-րդ դարում Սլոյանի գլխով գնդակ խաղացող ադրբեջանցի բարբարոսներին հերոս տվող ազգը չի դատապարտվել, հայ զինվորի կյանքը վտանգված է»,- այսօր «Տեսակետ» ակումբում ասաց բանախոսը:
Արփինե ՍԻՄՈՆՅԱՆ
