«Քաղաքացիական պայմանագիր» կուսակցության անդամ Ալեն Սիմոնյանը րոպեներ առաջ ֆեյսբուքյան իր էջի միջոցով հայտնել է, որ այսօր դիմում է ներկայացրել Ազգային ժողովի նախագահ Արա Բաբլոյանին՝ իր լիազորությունները որպես պատգամավոր դադարեցնելու մասին:
Այսօր ավելի վաղ Ազգային ժողովում լրագրողների հետ զրույցում Ալեն Սիմոնյանը, անդրադառնալով իր քաղաքապետ դառնալու հավանականությանը, նշել էր. «Ես որևէ հավակնությունների մասին չեմ կարող ասել: Ես կարող եմ ասել, որ ժամանակին, երբ «Ելքը» մասնակցել է Երևանի ավագանու ընտրություններին՝ ես եղել եմ քաղաքապետի թեկնածուներից մեկը: Եվ այո, եթե կուսակցությունը որոշի նման պատասխանատվություն ինձ վրա դնել, ես միգուցե համաձայնեմ: Բայց այսօր ես ինձ շատ լավ եմ զգում Ազգային ժողովում` իմ մասնագիտության, գիտելիքների բերումով, և օրենսդրի աշխատանքն այն է, ինչը ես միշտ սիրել եմ»: