Էրեբունիում ապրիլի 22-ին տեղի ունեցած զանգվածային անկարգությունների փաստի առթիվ հարուցված քրեական գործով մեղադրյալ Մասիսի փոխքաղաքապետ Կարեն Օհանյանը կմնա ազատության մեջ. այսօր դատարանը մերժել է նրան կալանավորելու երկրորդ միջնորդությունը, որն այս անգամ ներկայացրել էր գործով հսկողություն իրականացնող դատախազը։
«Առաջին անգամ քննիչի ներկայացրած կալանավորելու միջնորդությունը մերժվեց՝ հիմնավոր կասկածի բացակայության պատճառաբանությամբ։ Սակայն երեկ մենք անակնկալ ձևով դատարանից տեղեկացանք, որ հսկող դատախազը որոշել է նույն միջնորդությամբ հանդես գալ դատարանում։ Մինչև ուշ գիշեր շարունակվեց միջնորդության քննությունը դատարանում և գիշերը դատարանը անցավ խորհրդակցական սենյակ, և այսօր առավոտյան հրապարակվեց այն մերժելու որոշումը», – Aysor.am-ի թղթակցի հետ զրույցում ներկայացրեց Օհանյանի փաստաբան Զորայր Հարությունյանը։
Դիտարկմանը, թե դատախազը նոր միջնորդությունը ներկայացնելիս կցել է նաև հանցանքին Կարեն Օհանյանի առնչությունը վկայող տեսագրություններ, ինչը նախկին միջնորդությունը ներկայացնելիս չի արել քննիչը, փաստաբանը արձագանքեց.
«Նոր բան չկար, դրանք ընդամենը այն տեսագրություններն էին, որոնց մասին խոսք էր գնում քննիչի ներկայացրած միջնորդության մեջ, բայց որը կցված չէր։ Այս անգամ այդ տեսագրությունները կցված են եղել։ Նաև ավելացել էր ևս մեկ քննչական գործողության արձանագրություն, որը իրավիճակ չէր փոխում։ Դատախազն ասում էր, թե իրավիճակ է փոխում, բայց դատարանը որոշեց, որ իրավիճակ չի փոխվում, և անձին կալանավորելու համար հիմնավոր կասկածը բացակայում է»։
Հասմիկ Համբարձումյան
Նյութի մանրամասները կարդացեք սկզբնաղբյուր կայքում
