Հայաստանի երկրորդ նախագահ Ռոբերտ Քոչարյանի վերաքննիչ բողոքի քննությունը քիչ առաջ ավարտվեց: Դատավորը գնացել է խորհրդակցական սենյակ: Այդ մասին, նիստ ավարտից հետո, լրագրողների հետ զրույցում ասաց Ռոբերտ Քոչարյանի պաշտպաններից Արամ Օրբելյանը։
Վերաքննիչ քրեական դատարանը որոշումը կհրապարակի օգոստոսի 13-ին։ Պաշտպանի ակնկալիքները դրական են. «Կարծում եմ՝ պետք է բավարարվի»:
Ըստ պաշտպանի, Ռոբերտ Քոչարյանը այսօրվա նիստում էլ է խոսել եւ հայտնել է իր վերջնական դիրքորոշումը. Ռոբերտ Քոչարյանը պնդել է, որ չի ընդունում իրեն առաջադրված մեղադրանքը։
Մանրամասներ պաշտպանը կրկին չներկայացրեց, քանի որ նիստը փակ է:
«Մեր գնահատմամբ, քննիչի ներկայացրած փաստաթղթերից որեւէ մեկը չի ապացուցում, որ չկա պատշաճ վարքագծի խնդիր. ընդամենը ենթադրել, որ նա եղել է նախագահ, հետեւաբար ունի ազդեցություն, բավարար չէ, որպեսզի ենթադրվի անձի ոչ պատշաճ վարքագիծը»,- ասաց պաշտպանը`պատասխանելով հարցին ի՞նչ ակնկալիքներ ունեն, ի՞նչ որոշում կկայացնի դատարանը։
Նելլի ԳՐԻԳՈՐՅԱՆ
