«Ակնհայտ է՝ Գյումրիի 102-րդ ռուսական ռազմաբազայում Վալերի Պերմյակովից հետո մեծ հետեւություններ արված չեն, որովհետեւ այն վիճակն է, որ կար, երբ ողբերգական դեպքեր են լինում, իմացվում են, իսկ մնացած դեպքերը ՝ զինվորականների հարբեցողություն, նրանց մասնակցությամբ վեճեր մնում են, շատ դեպքերում, անհայտ»,- նման կարծիք հայտնեց Սախարովի անվան մարդու իրավունքների պաշտպանության գրասենյակի Շիրակի մարզային կառույցի ղեկավար Սեյրան Մարտիրոսյանը՝ անդրադառնալով ռուսական ռազմաբազայի զինծառայողի՝ այսօրվա ձերբակալության լուրին:
Հիշեցնենք, որ զինծառայողը ձերբակալվել է Գյումրիի Սլոբոդկա թաղամասում դեկտեմբերի 3-ին կնոջը դաժան ծեծի ենթարկելու կասկածանքով:
Սեյրան Մարտիրոսյանը դեպքից մանրամասներ չգիտի, տեղեկություններ չունի նաեւ ծեծի հետեւանքով մահացած կնոջ, նրա ընտանիքի վերաբերյալ, իսկ կատարվածի մասին չցանկացավ գնահատականներ տալ՝ ասելով, որ իրավապահ մարմինները շուտով կտան իրավական գնահատական:
«Ռուսական ռազմաբազան հայելային արտացոլանքն է Ռուսաստանի հասարակության, իսկ Ռուսաստանի հասարակությունում ամեն ինչ չէ, որ նորմալ է, բոլորս գիտենք, որ ռուսները հակում ունեն ալկոհոլային խմիչքների նկատմամբ: Դրանից առաջ եւ Ավետիսյանների սպանդից հետո ռուսական զորամասի հրամանատարությունը հատուկ միջոցներ պետք է ձեռնարկեր, որ կանխեր սպիրտայինի չարաշահումն իր զինծառայողների կողմից: Ի վերջո, խոսքը զինվորական ծառայության մասի՞ն է, թե՞ սպաների ու զինվորականների լավագույն հարբեցող լինելու մասին»:
Արփինե ՍԻՄՈՆՅԱՆ
