Պետական վերահսկողական ծառայության (ՊՎԾ) պետ Դավիթ Սանասարյանն այսօր կառավարության նիստից հետո անդրադարձավ «Ֆրեզեն» ՍՊԸ-ի տնօրեն Հրանտ Պիվազյանի այն հայտարարություններին, թե ՊՎԾ ղեկավարը իր բիզնեսը խլում է: Գործարարը նաեւ նշել էր, թե Դավիթ Սանասարյանը դա անում է մենաշնորհի դեմ պայքարելու անվան տակ:
«Մեղմ ժպտում եմ»,-ի պատասխան Հրանտ Պիվազյանի հայտարարությանը, ասաց պարոն Սանասարյանը՝ նշելով. «Ուսումնասիրությունից հետո հանրությունը կտեսնի՝ ինչի մասին է խոսքը: Մենք օրենքով մեզ վերապահված լիազորություններն ենք իրականացնում, որեւէ մասնավորի հետ հանդիպելու կարիք չունենք, մենք նայում ենք օրենքի տառը պահպանելուն»:
Սանասարյանն անդրադարձավ նաեւ իր անձի շուրջ շրջանառվող հնարավոր կալանավորման վերաբերյալ խոսակցություններին:
«Ես ուզում եմ ինձ ուշադիր նայեն, ես ձերբակալվողի նմա՞ն եմ: Ես պատի տակի բամբասանքներն առհասարակ չեմ մեկնաբանում, մարդիկ պատվեր են կատարում, շատերը երազ են տեսնում, փորձում են իրենց երազը գրել ֆեյսբուքում կամ քարոզչամիջոցում»:
Պարոն Սանասարյանը շնորհավորեց Ուրցաձոր համայնքում ընտրված գյուղապետ Ռաֆիկ Անդրեասյանին: Ուրցաձորում իրականացվելիք ուսումնասիրությունների առնչությամբ էլ նշեց, որ դրանք տեղի չունեցան, քանի որ. «Մենք ուղղակի խոսեցինք, հասկացանք՝ ինչը ինչոց է, ուսումնասիրություններ չսկսեցինք: Չենք ուսումնասիրել, գնահատեցինք, որ այս փուլում ռեսուրսը ավելի լուրջ գործերի վրա կարելի է ծախսել, մեր ռեսուրսը սահմանափակ է»:
ԵՊՀ ռեկտոր Արամ Սիմոնյանի հայտարարությունների առնչությամբ էլ վերահսկողականի ղեկավարը տեղեկացրեց, որ ԵՊՀ-ում խոսք է գնում 800 միլիոն դրամից ավելի կոռուպցիոն չարաշահումների մասին։
«Պարոն Սիմոնյանին մի քանի անգամ կոչ եմ արել, հիմա էլ հորդորում եմ իրեն, որ դիմի իրավապահ մարմիններին, գործը գնա դատական կարգով: Ես ինքս տարիներ շարունակ դեմ եմ եղել քաղաքական ճնշումներին, դրա դեմ կռիվ եմ տվել ու հիմա ինքս չեմ կարող դա անել, դա իմ սկզբունքների դեմ է: Որ պահին զգամ, որ անցնում եմ այդ գիծը, այդ պահին հրաժարական կտամ»,- ասաց Դավիթ Սանասարյանը՝ վստահեցնելով,որ Արամ Սիմոնյանի ասածները չեն համապատասխանանում իրականությանը:
Լուսինե ԲՈՒԴԱՂՅԱՆ
