ԵԽԽՎ համազեկուցողներ Յուլյա Լովոչկինան (Ուկրաինա) և Անդրեյ Շիրցելին (Սլովենիա) մարտի 12-14-ը փաստահավաք այց կկատարեն Երևան՝ մշտադիտարկման ենթարկելու Հայաստանի պարտավորությունների և հանձնառությունների կատարման ընթացքը:
Քննարկումները կկենտրոնանան վերջին քաղաքական զարգացումների և նոր կառավարության առաջնահերթությունների, ինչպես նաև ժողովրդավարական և սոցիալական բարեփոխումների վրա:
Նախատեսվում է, որ համազեկուցողները կհանդիպեն գլխավոր դատախազի, Բարձրագույն դատական խորհրդի նախագահի, Մարդու իրավունքների պաշտպանի, Հատուկ քննչական կոմիտեի ղեկավարի և Ամենայն հայոց կաթողիկոսի հետ:
Խորհրդարանում համազեկուցողները կհանդիպեն մարդու իրավունքների պաշտպանության և հանրային հարցերի, պետաիրավական հարցերի խորհրդարանական հանձնաժողովների նախագահների հետ, ինչպես նաև առանձին հանդիպումներ կունենան խորհրդարանական խմբերի ղեկավարների հետ:
Նախատեսվում է, որ նրանք կհանդիպեն նաև անկախ քաղաքական վերլուծաբանների հետ և կլոր սեղան հանդիպումներ կունենան ժողովրդավարության, իրավական և սոցիալական բարեփոխումների դաշտում գործող մի շարք հասարակական կազմակերպությունների հետ:
Պատրաստեց՝ Վիկտորյա ԱՆԴՐԵԱՍՅԱՆԸ
