«Սա ոչ քմահաճույք է, ոչ նախապայման: Քննարկումները շարունակում ենք մեր գործընկերների հետ: Այնտեղ, որտեղ գործընկերները համարեն, որ մեր դիրքորոշումը գնահատվում է շատ կարծր, կարող ենք այն մեղմացնել, բայց նույնը հակառակ կողմից ենք ակնկալելու, այլապես խոսակցություն տեղի չի ունենա»,-լրագրողների հետ հանդիպմանն այսօր անդրադառնալով Արցախի՝ բանակցային սեղանին վերադառնալու հնարավորությանը, ասաց վարչապետ Նիկոլ Փաշինյանը: Նա նշեց, որ իր այդ հայտարարությունը մարտահրավեր չէ, այլ երկխոսության հրավեր. «Այն սկսվել է Դուշանբեում, շարունակվել Դավոսում: Չենք պատկերացնում մի ռեժիմ, երբ կողմերից մեկը հրաժարվում է երկխոսել: Դա տրամաբանական չէ: Մենք չենք հրաժարվի երկխոսությունից եւ սեղանին կդնենք մեր փաստարկները՝ ուշադիր լսելով գործընկերների հակափաստարկները»:
Առաջիկա Փաշինյան-Ալիեւ հանդիպումն էլ, վարչապետի փոխանցմամբ, նվիրված է լինելու մի շարք պարզաբանումները պաշտոնապես արձանագրելուն. «Շատ հակասական տվյալներ կան, օրինակ, Կազանում կամ Վիեննայում տեղի ունեցածի մասին: Ես պարտավոր եմ բոլոր հարցերի պատասխաններն ունենալ: Ալիեւն արդեն տասնամյակից ավելի՝ բանակցությունների գործընթացում է: Միակ նոր մարդը ես եմ: Ինձ համար էլ շատ բան պարզ չէ, դրանում է երկխոսության նպատակը: Այդ պատճառով ասացի, որ Ալիեւի հետ վերջին հանդիպման ժամանակ մենք քննարկել ենք բանակցությունների պատմությունը»:
Ուղիղ։ Վարչապետ Նիկոլ Փաշինյանի մամուլի ասուլիսը
Gepostet von Aravot am Dienstag, 19. März 2019
Լուիզա ՍՈՒՔԻԱՍՅԱՆ
