«Հին Հայաստանը, երբ որ գնաց, նոր Հայաստանում մեր վիճակն ավելի վատացել է: Իրավիճակ է փոխվել, բայց ոչ մեզ համար, ավելի վատ»,- այսօր ԱԺ-ում մարդու իրավունքների թեմայով խորհրդարանական լսումների ժամանակ հայտարարեց Ասորական ֆեդերացիայի նախագահ Իրինա Գասպարյանը:
Ըստ նրա, այն մեխանիզմները, որոնք կային իրենց իրավունքների պաշտպանության համար, չկան. «Նոր իշխանությունը, արդեն մի տարի է, չի կարողանում կողմնորոշվի ինչ անի, ոնց են համակարգում խորհուրդը, այն որոշումը, որը կար համակարգող խորհրդի ստեղծման, դեռ կա, չեղյալ չեն համարել, նոր որոշում չկա, եւ մենք չգիտենք ինչ կարգավիճակում ենք: Բազում հարցեր են առաջանում: Կրթական հարցերով, օրինակ, հարցում ենք արել կառավարությունից մարզպետարաններ, մարզպետարաններից ստացել ենք պատասխաններ եւ արդեն փաստ է, որ հակաասորական քաղաքականություն է գնում:
ԵՄ-ին զեկույց է ներկայացնում ազգային փոքրամասնությունների լեզուների պաշտպանության խարտիայի վերաբերյալ եւ Հայաստանի զեկույցը չի համընկնում այն իրականությանը, որը կա եւ ֆիքսված է պաշտոնական նամակներում, որը ստացել ենք մարզպետարաններից: Դա խայտառակություն է: Համակարգող խորհուրդը մեզ հնարավորություն էր տալիս նաեւ օպերատիվ հարցերը բարձրացնել: Միջանկյալ օղակները մինչեւ հասկանում են, շատ անտարբեր են, հատկապես հիմա, որ պատկերացում էլ չունեն ինչի մասին է խոսքը գնում: Մինչեւ բացատրում ես, անցնում են ամիսներ, կես տարի»:
Կարդացեք նաև
Իրինա Գասպարյանը հայտարարեց, որ անցյալ տարվա մայիսից դիմում է գրել կրթության եւ գիտության նախարարին. «Կարողացա հանդիպել հոկտեմբերին: Նախկին իշխանության ժամանակ նման բան չէր լինում, մենք շատ արագ կարայինք հանդիպեինք ցանկացած նախարարի հետ, հարցը դնեինք եւ հարցը լուծվում էր: Հիմա ոչ մի մեխանիզմ չունենք»:
Նա իշխանություններին հիշեցրեց՝ «Հայաստանը պարտավորություններ ունի, խնդրում ենք դա կատարել»:
Հռիփսիմե ՋԵԲԵՋՅԱՆ
