«Հայտարարության մեջ մեկնաբանություն չի արել՝ ինչու է կասեցված գործը վերաբացել, ի՞նչ նոր հանգամանքով է: Պարզապես նամակ եմ ստացել, որ գործը վերաբացվել է»,- Aravot.am-ի հետ զրույցում ասաց լրագրող Թեհմինե Ենոքյանը, որը 2015 թվականին տեղի ունեցած էլեկտրաէներգիայի թանկացման դեմ ակցիայի՝ «Էլեկտրիկ Երեւանի» ժամանակ տասնյակ մարդկանց թվում տուժել է քաղաքացիական հագուստով ոստիկանների գործողություններից:
Թեհմինե Ենոքյանը երեկ Հատուկ քննչական ծառայությունից նամակ է ստացել, որ գործի վարույթը վերսկսվել է։ Փաստաթղթում մասնավորապես նշված է՝ «ՀՀ քրեական դատավարության օրենսգրքի 260-րդ հոդվածի 3-րդ մասի կարգով հաղորդում եմ Ձեզ, որ դատախազի կողմից կասեցման որոշումը վերացնելու հիմքով թիվ 62217915 քրեական գործով կասեցված վարույթը վերսկսվել է»։
Հիշեցնենք, որ մոտ երկու ամիս առաջ ՀՔԾ-ն կասեցրել էր «Էլեկտրիկ Երեւանի» գործը՝ պատճառաբանությամբ, որ չեն գտնում լուսանկարներում առկա մարդկանց:
Թե ինչ հիմքով է կասեցված գործը վերաբացվել, արդյոք նոր երեւան եկած հանգամանքներ կան, կամ գուցե գտել են լուսանկարների՝ քաղաքացիական հագուստներով ոստիկաններին, գործում որպես տուժող հանդիսացող Թեհմինե Ենոքյանը չէր կարող ասել: Մեզ հետ զրույցում նա ասաց, որ իրեն դեռ չեն հրավիրել ՀՔԾ, եւ չգիտի էլ՝ կկանչեն, թե ոչ: Ասաց նաեւ, որ գործը քննում է նույն քննիչը՝ Վազգեն Ավետիսյանը: Թեհմինե Ենոքյանի խոսքով, իրեն ծանուցված ծրարում 40-ից ավելի քաղաքացիների անուն ազգանուններ ու հասցեներ են նշված, որոնք նույնպես առնչվում են գործին:
Կարդացեք նաև
Aravot.am-ի հետ զրույցում ՀՀ դատախազության հանրային կապերի բաժնի պետ Արեւիկ Խաչատրյանը մեր հարցերին ի պատասխան ասաց, որ տուժողներն ու իրավահաջորդները բողոք են ներկայացրել, դրա հիման վրա է:
Գործի կասեցումը վերացվել եւ կրկին ուղարկվել է Հատուկ քննչական ծառայություն՝ ՀՔԾ՝ նորից նախաքննությունը շարունակելու:
Լուսինե ԲՈՒԴԱՂՅԱՆ
