ՀԱՅՏԱՐԱՐՈՒԹՅՈՒՆ
Շնորհավորում ենք Հայաստանի Հանրապետության քաղաքացիներին և համայն հայությանը՝ Լեռնային Արցախի բնական մայրաքաղաքի՝ Շուշիի ազատագրման 27-ամյա, նացիզմից Եվրոպայի ազատագրության 74-ամյա և Նիկոլ Փաշինյանի, ՀՀ Վարչապետ ընտրվելով, երկրում Քաղաքացու կամքի պատմական հաղթանակների 1-ին տարեդարձի առթիվ: Հայության ներկա սերնդին մեր մայիսության բազմատոնը հիրավի անանց տոնի վերածելու պատմական բացառիկ պատեհություն է ընձեռված:
Մեկ տարվա մեջ մեր երկրում դրվեցին արդար հասարակություն և ժողովրդավարական պետություն կառուցելու կամային ոչ սակավ հիմքեր: Այս պատմական գործընթացի տրամաբանությունն անշրջելի դարձնելու համար՝ բեկումնային հնարավորություն ընձեռած ներկա պատմաշրջանում ՀՀ վերնախավի, քաղաքական ուժերիս և բոլոր քաղաքացիներիս պարտքն է հնարավոր բոլոր միջոցներով ձգտել ամրակայելու մեկամյա նվաճումը՝ զարգացնելով արդի աշխարհի տրամաբանությանը համարժեք արագություններ՝
- Աշխարհի համար ընկալելի և պետականավարման ցայժմ հայտնի միակ արդյունավետ համակարգի՝ հիմնովին ավերված քաղաքական դաշտի ստեղծման և ամրակայման,
- Երկրից կողոպտված ու դուրս հանված ահռելի միջոցների վերադարձով ՀՀ քաղաքացիների մեջ սեփական երկրում արարելու մոտիվացիան աներկբա դարձնելու,
- Ծայրահեղությունների չհասնող, բայց և հատու անցումային արդարդատության հավասարակշռված ներդրմամբ մեկ տարի առաջ ծագած հույսը Հայաստանի և Արցախի բնակչության շրջանում անմար պահելու,
- Լյուստրացիայի միջոցով՝ հանրային բաղադրիչների ոչ հայկական շահեր սպասարկող գործունեությունը զսպելու, հաստատված քրեաօլիգարխիկ իշխանական համակարգն ապամոնտաժելու և քաղաքակրթական հուսալի ապագա ունեցող ժամանակակից երկիր կառուցելու,
- Քաղաքական, մշակութային, տնտեսական, սոցիալական թռիչքային զարգացման հիմքերի հիմքը հանդիսացող հոգևոր անվտանգության դաշտն անխոցելի դարձնելու ուղղություններով:
Հաջողման ոչ միայն քաղաքական, այլև բարոյական պատասխանատվությունը վաղը և պատմության առջև առաջին հերթին և հիմնականում կրելու են իշխանական ներկայիս վերնախավի պատասխանատուները, սակայն պարտավորեցման հրամայականի ներքո են նաև քաղաքական և հանրային բոլոր ուժերն ու քաղաքացիներն ընդհանրապես:
Կարդացեք նաև
«Ժողովրդավարական Հայրենիք» կուսակցություն
Պահպանողական կուսակցություն