– Վարչապետի պաշտոնը զբաղեցնող Նիկոլ Փաշինյանի գործողությունները ՀՀ դատական համակարգը կազմաքանդելու ուղղությամբ իշխանության բռնազավթման գործընթացի շարունակությունն է: Այն սկսվել է նախորդ տարի մայիսին:
Իշխանության բռնազավթման փուլերից էր միջազգայնորեն ճանաչված 6-րդ գումարման Ազգային ժողովի հոկտեմբերի 2-ի զավթումը, լուծարումը, որի փոխարեն ձեւավորվեց ապօրինի, խամաճիկային ներկայիս խառնաժողովը: Այսօր Փաշինյանը փորձում է զավթել երրորդ իշխանությունը` դատարանները, վաղը կփորձի վերացնել չորրորդ իշխանությունը` ԶԼՄ-ները, ինչի նախանշանները արդեն ի հայտ են եկել: Փաշինյանը զգալով, որ իր ապօրինի իշխանության կործանումը մոտ է եւ գիտակցելով, որ դրանից հետո նա կրելու է դատարանի առաջ օրենքով սահմանված պատասխանատվություն, փորձում է, առանց միջոցների մեջ խտրականություն դնելու, կարճել իշխանությունից, միաժամանակ կատարելով իր օտարերկրյա պատվիրատուների ազգակործան պատվերները,- ասել է ՍԻՄ կուսակցության նախագահ Հայկ Բաբուխանյանը:
– Այդ ամենը արդեն բերում է եւ դեռեւս կհանգեցնի երկրի համար անդառնալի հետեւանքների, վերամիավորված երկրի տարածքների եւ ինքնիշխանության կորուստի, հայոց պետականության տապալմանը:
Հետեւապես ՍԻՄ կուսակցության անունից կոչ եմ անում.
Կարդացեք նաև
Հայաստանի բոլոր հայրենասեր ու օրինապաշտ քաղաքացիներին չհետեւել իշխանությունը զավթած խմբակի ապօրինի կոչերին, կատարել սահմանադրության եւ ՀՀ օրենքների պահանջները, չտրվել ազգը պառակտող իշխանական սադրանքներին:
ՀՀ նախագահին, բարձրագույն դատական խորհրդին, ՀՀ բոլոր օրինական ընտրված եւ նշանակված պաշտոնյաներին կոչ ենք անում անշեղորեն կատարել իրենց սահմանադրական պարտականությունները:
Հասարակության բոլոր առողջ ուժերին` քաղաքական կուսակցություններին, հասարակական կազմակերպություններին, մտավորականների միություններին կոչ ենք անում անհապաղ սկսել կոնսուլտացիաներ երկիրը անդառնալի հետեւանքներից հետ պահելու եւ հայոց պետականությունը փրկելու ուղղությամբ:
ՍԻՄ լրատվական ծառայություն