Ինչպես արդեն տեղեկացրել էինք Black Sabbath խմբի կիթառահար Թոնի Այոմին և Deep Purple խմբի վոկալիստ Իէն Գիլանը չորեքշաբթի մասնակցում էին Rock Aid Armenia-ի 30-ամյակին նվիրված տոնական երեկոյի:
«Մենք հավատում ենք հայ ժողովրդին, հայ ժողովուրդը ֆանտաստիկ է»,- ասաց Թոնի Այոմին՝ հավելով, որ իրենք միայնակ չէին կարող այդքանը անել և կցանկանար, որ գնալով ավելանար օգնություն տվող մարդկանց թիվը: «Հայաստանում տաղանդավոր երաժիշտներ կան, մենք առիթ ունեցանք այսօր մի քանիսին լսելու, ես մեծապես տպավորված էի իրենց կատարումներից»:
Իէն Գիլանն էլ նշեց, որ երբ 1988 թվականին տեղի ունեցած երկրաշարժից հետո մեկ տարի անց այցելել է Սպիտակ ցնցված և տպավորված է եղել. «Տարիների ընթացքում ես սիրեցի հայ ժողովրդի ոգին և հայկական մշակույթը: Դժվար է բառերով արտահայտել այն զգացումը, երբ մեկին սիրում ես, բայց երկար ժամանակ բաժանված ես նրանից: Ես հիշում, երբ իմացանք Ջոն Լորդի մահվան բոթը, մենք ձայնագրման ստուդիայում էինք: Մենք երկար ժամանակ սպասում էինք դա, բայց այդուհանդերձ այն ցնցող լուր էր: Մենք այդ ընթացքում մի քանի երգ ենք գրել, որոնք Ջոնի հետ մեր կապի մեծ ազդեցությունն ունեն: Ինչպե՞ս կարող ենք նրան մոռանալ ժամանակի ընթացքում, նրա մասին հիշողությունները չեն խամրում: «Above Beyond» երգում մի տող կա՝ «Your souls had been touched are forever entwined» (Հոգիները, որ միմյանց հպվել են, մնում են ընդմիշտ միահյուսված): Այդ նախադասությունը մտքիս է գալիս, երբ մտածում եմ Հայաստանի մասին»:
Կարդացեք նաև
Rock Aid Armenia-ի հիմնադիր Ջոն Դին էլ հավելեց, որ իրենք հենց այնպես չեն կամավոր այս աշխատանքը կատարում. «Այս թիմի շնորհիվ Գյումրիում դպրոց է կառուցվել: Եվ այս թիմով ուզում ենք Հայաստանին օգնել ի հայտ բերել լավագույն երգիչներին և երաժիշտներին»:
1989 թվականին DoSomething ավստրալիական կազմակերպությունը նախաձեռնել էր Rock Aid Armenia ծրագիրը՝ Սպիտակի երկրաշարժից տուժած Հայաստանին օգնելու նպատակով: Ծրագրի 30-ամյակի առթիվ Հայաստան են այցելել Black Sabbath խմբի կիթառահար Թոնի Այոմին և Deep Purple խմբի վոկալիստ Իէն Գիլանը:
Ամի ՉԻՉԱԿՅԱՆ
