Լրահոս
Օրվա լրահոսը

Արտյոմ Ծառուկյան. «Ինչ չի բխում հայ ավանդական ընտանիքի, հայ տեսակի, հայի գենի շահերից, «Բարգավաճ Հայաստանը» դրա դեմ առաջին շարքերում պայքարում է»

Հուլիս 21,2019 11:00

ԱԺ «Բարգավաճ Հայաստան» խմբակցության պատգամավոր Արտյոմ Ծառուկյանը Շախմատի միջազգային օրվա առիթով Ազգային ժողովի այգում կազմակերպված փառատոնի ընթացքում Aravot.am-ի հետ զրուցեց ոչ միայն շախմատի մասին:

-Որքանո՞վ եք կապված շախմատի հետ:

-Շախմատն իմ կյանքում ամենօրյա ներկայություն ունի: Այն զարգացնում է մարդու  տրամաբանությունը, հեռուն տեսնելու, հաշվարկելու կարողությունները, ինչպես իմ պարագայում նաեւ մաթեմատիկան: Եվ այս առումով ողջունում եմ, որ շախմատը որպես առարկա դասավանդվում է դպրոցում: Ինքս պրոֆեսիոնալ մակարդակով չեմ մարզվել: Ավելի շուտ ինքնուս եմ: 1987 թվականին պապիկս մեծ եղբորս շախմատ էր նվիրել, որից օգտվում էի նաեւ ես: Ֆիգուրների հետ էի խաղում: Հետո սկսեցի քայլերը հասկանալ ու հասունացման տարիքում արդեն սիրեցի շախմատը: Հիմա էլ ընկերներով ժամանակ առ ժամանակ հավաքվում խաղատախտակի շուրջ: Այն 20 րոպեն կամ կես ժամը, որ տրամադրում եմ շախմատին, ինձ հանգստացնում է, ինչից հետո ավելի թարմ եմ զգում:

-Հիմա, հավանաբար, արդեն ավելի թարմ եք եւ եկեք այլ թեմաների մասին էլ խոսենք: Օրվա թոփ թեմաներից Ստամբուլյան կոնվենցիայի մասին ի՞նչ կասեք:

-Պատասխանեմ իմ անունից: Մեր խմբակցության հստակ դիրքորոշումը դուք դեռ կլսեք: Դիրքորոշումը հստակ է: Անկախ նրանից, թե կլինի Ստամբուլյան կամ այլ կոնվենցիա, օրենք կամ օրենսդրական նախաձեռնություն, ես եւ «Բարգավաճ Հայաստանի» իմ գործընկերները հայկական ավանդապաշտ ընտանիքի եւ հայկական ավանդական արժեքների կողմնակիցն ու պահապանն ենք: Հետեւաբար, բոլոր այն նախաձեռնությունները, փաստաթղթերի վավերացումները, օրենքները, օրենքի նախագծերը, քննարկումները, որոնք չեն բխում հայ ընտանիքի բարոյական արժեքներից, հայ տեսակից, հայի գենից, մենք այդ ամեն ինչին միանշանակ ոչ միայն դեմ ենք,  այլեւ առաջին շարքերում պայքարում ենք: Սակայն քանի որ  կոնվենցիայի մասով Սահմանադրական դատարանը դեռ կարծիք չի հայտնել՝ հակասո՞ւմ է արդյոք, մեր սահմանադրությանը , թե ոչ: Ես իրավաբան չեմ, բայց Սահմանադրության 35 հոդվածի մասով ինքս խնդիր եմ տեսնում: Սահմանադրական դատարանի կարծիքից հետո մեր խմբակցությունը իր դիրքորոշումը կարտահայտի:

-Վեթթինգի մասին ասելիք ունե՞ք:

-Այդ հարցում հիմա հարաբերական անդորր է: Վենետիկի հանձնաժողովն իր կարծիքն ասել է: Բայց անձամբ ես երբեք դեմ չեմ եղել վեթթինգին՝ սկսած ԱԺ պատգամավորներից: Ուղղակի դրա համար պետք է այն կարգավորող համապատասխան օրենսդրական կարգ լինի, որը մենք չունենք: Այսինքն, ավանդույթի համաձայն սկսում ենք վերջից: Մենք պետք է հասկանանք, վեթթինգ անելու բուն քայլերը ինչի՞ց պետք է սկսել, ո՞վ է դա կազմակերպելու եւ այլ հարցեր, որոնց պատասխանները մինչեւ վերջ չունենք: Իսկ այդ պարագայում արդյունավետության մասին նախնական կարծիք հնարավոր չէ արտահայտել:

-Երեք թոփ թեմաներից մնաց Սահմանադրական դատարանի ճգնաժամի մասին հարցը:

-Դրա մասին շատ է խոսվել: Սահմանադրական դատարանը ունի նախագահ, ունի անդամներ եւ կարծում եմ՝ իր լիազորությունների շրջանակներում աշխատում է:

 

Աշոտ ՀԱԿՈԲՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (1)

Պատասխանել

  1. Levon says:

    Մեռա ծիծաղից :Ճ Հայու գեն: Կարող եք մեկ կամ երկու տարբերություններ նշել ավանդական հայ և ավանդական վրացական, ասորական կամ հունական ընտանիքների միջև բացի նրանից որ հայկական ընտանիքում (լավագույն դեպքում) հայերեն են խոսում: Եվ օրինակ ռուսախոս ու Հայաստանում ապրող հայ ընտանիքը կարող՞ է ավանդական հայկական ընտանիք համարվել թե ոչ:

Պատասխանել

Օրացույց
Հուլիս 2019
Երկ Երե Չոր Հնգ Ուրբ Շաբ Կիր
« Հուն   Օգո »
1234567
891011121314
15161718192021
22232425262728
293031