ՀՀ ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանն ու ԱԺ պատգամավորները հոկտեմբերի 3-ին հանդիպել են Երեւանում գտնվող Եվրոպական հանձնաժողովի հարեւանության եւ ընդլայնման բանակցությունների գլխավոր տնօրինության Հայաստանի հետ գործընկերության բաժնի ղեկավար Վասիլիս Մարագոսի գլխավորած պատվիրակության եւ Հայաստանում ԵՄ ներկայացուցչության ղեկավար Անդրեա Վիկտորինի հետ:
Արման Եղոյանը, ողջունելով հյուրերին Ազգային ժողովում, պատրաստակամություն է հայտնել աջակցել նորանշանակ ԵՄ ներկայացուցչության ղեկավարին մեր երկրում իր կարեւոր առաքելությունն իրականացնելու գործում:
Անդրեա Վիկտորինին, կարեւոր համարելով ԵՄ-Հայաստան գործակցությունը, նշել է, որ երկուստեք հարաբերություններն արագ եւ նպատակային են զարգանում:
Վասիլիս Մարագոսը ներկայացրել է Եվրոպական Միության հետ համագործակցության ճանապարհային քարտեզը, անդրադարձել մի շարք ծրագրերի, նշել դրանց իրականացման ուղիներն ու ֆինանսական հատկացումները: Կարեւորվել են կրթության, էներգետիկայի, փոքր ու միջին ձեռնակատիրության, գյուղատնտեսության, քաղաքացիական հասարակության, էլեկտրոնային կառավարման, արդարադատության ոլորտներում որոշակի ծրագրերի իրականացումը: Նշվել են նաեւ արտոնյալ վարկային պայմաններով մասնավոր փոքր ձեռնակատիրություն կազմակերպելու խնդիրները:
Կարդացեք նաև
Վասիլիս Մարագոսը տեղեկացրել է, որ եվրոպական կողմը պատրաստ է աջակցելու կրթության բնագավառում բարեփոխումներին: Նրա հավաստմամբ` ցանկացած համագործակցության հիմքը քաղաքական երկխոսությունն է, ինչը շարունակական է: Բանախոսը փաստել է, որ ապագա բարեփոխումներին եւս աջակից կլինեն:
Գալիք տարի Հայաստան կժամանի մասնագետների մի խումբ, որը տարբեր բնագավառներում կցուցաբերի փորձագիտական օժանդակություն: Համակարգված, հստակ ծրագրեր կիրականացվեն նաեւ մարզերում:
ՀՀ Ազգային ժողով
