ԱՄՆ կոնգրեսականների մեծամասնության կողմից ընդունված Հայոց ցեղասպանությունը ճանաչող բանաձևին արձագանքներ են հնչել ինչպես Միացյալ Նահանգներում, այնպես էլ Երևանից ու Անկարայից:
ԱՄՆ վարչակազմը դեռևս չի արձագանքել հոկտեմբերի 29-ին Հայոց ցեղասպանությունը ճանաչող Ներկայացուցիչների պալատի թիվ 296 բանաձևի ընդունմանը: ԱՄՆ պետքարտուղարությունը տարբեր վարչակազմերի օրոք բազմիցս հակազդել է ԱՄՆ Կոնգրեսի օրակարգում Հայոց ցեղասպանության վերաբերյալ բանաձևերի ընդգրկմանը՝ ճնշում գործադրելով օրենսդիրների վրա այն տապալելու համար:
Washington Post-ի փոխանցմամբ՝ ԱՄՆ Ներկայացուցիչների պալատի արտաքին հարաբերությունների հանձնաժողովի նախագահ, կոնգրեսական Էլիոթ Էնգելը նշել է, որ չի ստացել որևէ ահազանգ վարչակազմից այս առիթով: Թերթը նաև մեջբերել է բանաձևի դեմ քվեարկած հանրապետական կոնգրեսական Գրեգ Փենսին, ով ԱՄՆ-ի փոխնախագահ Մայք Փենսի եղբայրն է: Վերջինս ընդգծել է, որ դեմ է քվեարկել, քանի որ վստահելով վարչակազմի քաղաքականությանը Թուրքիայի հարցում, չի ցանկանում ներգրավվել այս խնդրում:
Հայոց ցեղասպանության բանաձևի ընդունումը ողջունել են ԱՄՆ նախագահի թեկնածուներ Ջո Բայդենը և Էլիզաբեթ Ուորենը: Վերջինս կոչ է արել ԱՄՆ Սենատին ևս ճանաչել Ցեղասպանությունը: Սենատի և նախագահի կողմից Ցեղասպանության ճանաչման անհրաժեշտության մասին է ակնարկել նաև ՄԱԿ-ում ԱՄՆ նախկին դեսպան Սամանթա Փաուերը New York Times-ում հրապարակած իր հոդվածում:
Կարդացեք նաև
Ինչպես սպասվում էր, Երևանից ու Անկարայից հնչեցին արմատապես տարբեր արձագանքներ: ՝՝Ամերիկայի Ձայն՛՛-ը մեկնաբանության նույն խնդրանքով դիմեց ԱՄՆ-ում Թուրքիայի և Հայաստանի դեսպանություններին:
Մինչեւ այս հաղորդումը պատրաստելու պահը ՝՝Ամերիկայի Ձայն՛՛-ի մեկնաբանության խնդրանքին որևէ պատասխան չի ստացվել Թուրքիայի դեսպանությունից: Բանաձևին անդրադարձել է Թուրքիայի նախագահ Ռեջեփ Էրդողանը, ով իր ելույթում դատապարտել է դրա ընդունումը և նշել, որ Անկարան այն դիտարկում է որպես վիրավորանք՝ ուղղված թուրք ազգին:
Բանաձևի ընդունումից հետո Թուրքիայի արտգործնախարարությունը իր մոտ է հրավիրել Անկարայում ԱՄՆ դեսպան Դեյվիդ Սաթեֆիլդին՝ բանաձևի վերաբերյալ իր մտահոգությունները հայտնելու համար: Թուրքիայի արտգործնախարարության տարածած հայտարարությունը այն որակել է անհիմն և զերծ՝ պատմական ու իրավական հիմքերից:
Իր հերթին ԱՄՆ-ում ՀՀ դեսպան Վարուժան Ներսիսյանը, ի պատասխան ՝՝Ամերիկայի Ձայն՛՛-ի հարցին նշել է, որ բանաձևի ընդունումը կարևոր ուղերձ է Ցեղասպանության միջազգային ճանաչման և հետագա կանխարգելման տեսանկյունից: Դեսպանն ընդգծել է, որ այն կնպաստի, այլ ոչ թե կխանգարի հայ-թուրքական հնարավոր ապագա հաշտեցմանը:
Նախօրեին ՀՀ վարչապետ Նիկոլ Փաշինյանը թվիթերյան գրառմամբ ողջունել էր բանաձևի ընդունումն ու շնորհակալություն հայտնել ԱՄՆ կոնգրեսականներին այս առիթով՝ ընդգծելով, որ այն կարևոր քայլ է դեպի ճշմարտության ու պատմական արդարության հաստատումը: Հայաստանի արտգործնախարարությունն այս առիթով իր հայտարարությունում Հայոց ցեղասպանության բանաձևի ընդունումը համարել է կարևոր ներդրում միջազգային ջանքերին նոր ցեղասպանությունների ու զանգվածային սպանդերի կանխարգելման հարցում:
