Ազգային ժողովն այսօր առաջին ընթերցմամբ ընդունեց «օրենքով գողերին» եւ քրեական ենթամշակույթին առնչվող աղմկոտ օրինագիծը, որը քրեական պատասխանատվություն է սահմանում՝ քրեական ենթամշակույթ կրող խումբ ստեղծելու, խմբին հարելու համար:
Մինչեւ քվեարկությունը ԲՀԿ պատգամավոր Արտյոմ Ծառուկյանը խմբակցության անունից հայտարարեց. «Ցավում եմ, որ մեր որոշ գործընկերներ անձնավորված թիրախավորեցին մեր որոշ գործընկերների:
Ինչեւէ, ԲՀԿ-ի մոտեցումն այն է, որ ցանկացած հանցագործ պետք է պատժվի, ցանկացած սպառնալիք պետք է մեկուսացվի: Սակայն իրավական առումով այս օրինագիծը ծայրից ծայր խոցելի է, ուստի մենք «դեմ» ենք քվեարկելու»:
Կարդացեք նաև
«Լուսավոր Հայաստան»-ի պատգամավոր Տարոն Սիմոնյանն էլ հայտնեց՝ օրինագծում իրավական անորոշություն կա, որն անմեղ մարդկանց հանդեպ իրավական հետապնդում կառաջացնի, ուստի ԼՀԿ-ն «ձեռնպահ» է քվեարկում:
«Իմ քայլի» պատգամավոր Վլադիմիր Վարդանյանն էլ նկատեց՝ երբ օրինագիծը քննարկվում էր պետաիրավական հարցերի հանձնաժողովում, իրավական բացերի մասին առաջարկներ չարվեցին, եւ առաջարկները դեռ կարող են քննարկվել՝ մինչեւ երկրորդ ընթերցում:
«Իմ քայլի» պատգամավոր Արփի Դավոյանն էլ արձագանքեց Արտյոմ Ծառուկյանի հայտարարությանը. «Իմ քայլը» չի թիրախավորել ձեր խմբակցության որեւէ պատգամավորի, պարզապես մեջբերումներ են արվել ձեր խմբակցության պատգամավորների խոսքերից: Դա թիրախավորում չէ, այլ մեջբերում»:
Հավելենք, որ օրինագիծը դեռ պետք է անցնի երկրորդ ընթերցում:
Լուիզա ՍՈՒՔԻԱՍՅԱՆ
