Հունվարի 30-ին Արցախում մահացած զինծառայող Վահրամ Ավագյանի գործով կալանավորված ՀՀԿ-ական նախկին պատգամավորի՝ Առաքել Մովսիսյանի որդու պաշտպանն արդեն ներկայացրել է վերաքննիչ բողոքը: Փաստաբան Գոռ Գեւորգյանը Aravot.am-ին հայտնեց, որ իր բողոքը երեկ է մուտք արվել դատարան, բայց դեռ հայտնի չէ, թե որ օրը կնշանակվի բողոքի քննությունը:
Փաստաբանը բողոքարկելու է իր պաշտպանյալի նկատմամբ ընտրված խափանման միջոց կալանքը: Հիշեցնենք, որ Գոռ Գեւորգյանը ավելի վաղ մեզ հետ զրույցում ասել էր, որ անհիմն է համարում իր պաշտպանյալի՝ Դավիթ Մովսիսյանի կալանավորումը:
«Շատ հիմնավոր բողոք է, իրենց բոլոր թերությունները վերհանված են, իրավական պայքար կմղենք, տեսնենք՝ այս անգամ ինչ հիմնավորումներ կբերեն »,- ասաց փաստաբանը:
Ըստ նրա՝ իր պաշտպանյալի կալանավորումից հետո քննչական որեւէ գործողություն չի եղել:
Կարդացեք նաև
Տուժողի իրավահաջորդի ներկայացուցիչն էլ մեզ հետ զրույցում ասաց, որ նոր է պատրաստվում ներգրավվել գործում որպես պաշտպան եւ գործի նյութերին դեռ ծանոթ չէ, առաջիկա օրերին, երբ ծանոթանա նյութերին, կկարողանա գործի մասին խոսել:
Հիշեցնենք նաեւ, որ 2020թ. հունվարի 30-ին՝ ժամը 13:15-ի սահմաններում, ՊԲ բանակային ուսումնական կենտրոնում, N զորամասի պարտադիր ժամկետային զինծառայող, շարքային Վահրամ Մկրտիչի Ավագյանի մահվան դեպքի առթիվ հարուցված քրեական գործի շրջանակներում ձերբակալվել են Ավագյանի համածառայակիցներ Դավիթ Առաքելի Մովսիսյանը, Խաչիկ Արմենի Գասպարյանը, Սպարտակ Արթուրի Ավետիսյանը: Ավելի ուշ Դավիթ Մովսիսյանը կալանավորվեց, իսկ մյուս զինծառայողների կալանքի միջնորդություն է ներկայացվել դատարան:
Արփինե ՍԻՄՈՆՅԱՆ
