ԱԺ լիագումար նիստում այսօր, երբ իշխանությունն ու ընդդիմությունը բանավիճում էին, թե ով է հայհոյանքի մշակույթի հեղինակը, «Քաղաքացիական պայմանագրի» պատգամավոր Հայկ Կոնջորյանն ամբիոնի մոտ միացրեց ՀՀԿ-ական նախկին պատգամավոր Առաքել Մովսիսյանի խոսքերը, որոնցով նա սպառնում էր կտրել նրանց գլուխները, որոնք բացասաբար են արտահայտվել Սեյրան Օհանյանի ընտանիքի հասցեին, գլխատել եւ բռնաբարել։ «Նախկին իշխանության ժամանակ եւս եղել է այս անընդունելի վարվելակերպը։ Հիմա էլ է անընդունելի, բայց նախկին իշխող խմբակցության պատգամավորը խոստանում է նախ գլխատել․․․դա դեռ հարց է՝ գլխատել, հետո բռնաբարե՞լ, թե․․․բայց դուք պատկերացնո՞ւմ եք»,-դիմելով ընդդիմությանը՝ ասաց Հայկ Կոնջորյանը։
«Մեզ մեղադրում եք բռնության մշակույթ տարածելու համար, մինչդեռ ձեր պատգամավորն էր սպառնում գլխատել, հետո՝ բռնաբարել, կամ հակառակը»,-հավելեց նա։
Հիշեցնենք՝ ԱԺ-ն այս տարի ընդունել էր իշխանական «Իմ քայլը» խմբակցության հեղինակած փաթեթը, որով ծանր վիրավորանք հասցնելը՝ հայհոյելը, պատժվում է տուգանքով, իսկ պարբերաբար կրկնվելու դեպքում՝ մեկ ամիս կալանքով։
«Հայաստան» դաշինքից Աղվան Վարդանյանն առաջարկում է անվավեր ճանաչել 137.1. հոդվածը, որը մասնավորապես սահմանում է՝ միեւնույն անձին ծանր վիրավորանք հասցնելը՝ հայհոյելը կամ նրա արժանապատվությունն այլ ծայրահեղ անպարկեշտ եղանակով վիրավորելը պարբերաբար կրկնելու դեպքում պատժվում է տուգանքով՝ նվազագույն աշխատավարձի հազարապատիկից երեքհազարապատիկի չափով կամ կալանքով՝ մեկից երեք ամիս ժամկետով:
Կարդացեք նաև
ՔՊ-ականները դեմ են առաջարկին։
Լուիզա ՍՈՒՔԻԱՍՅԱՆ
