Երեկ Գյումրի բժշկական կենտրոն են տեղափոխել 1984 թվականին ծնված Մ․Հ․-ին։ Շունը կծել է նրա ձեռքը (նրան տեղափոխել են բազկի ստորին երրորդականի շան կծած-պատառոտված վերքով), որը և վիրահատել են։ Այս մասին Aravot.am-ին տեղեկացրեց Գյումրի բժշկական կենտրոնի փոխտնօրեն Արմեն Խաչատրյանը։ Լուսանկարը չենք հրապարակում ՝ ելնելով էթիկայի կանոններից։
Արմեն Խաչատրյանը փոխանցեց, որ կնոջ վիճակը միջին ծանրության է, ցույց է տրվել առաջին բուժօգնությունը, նա պառկած է վնասվածքաբանական բաժանմունքում։
Հիվանդանոցի տնօրեն Արմեն Իսահակյանի տվյալներով էլ, վերջին երեք տարիներին «Գյումրի բժշկական կենտրոն» ՓԲԸ-ի վնասվածքաբանական կետի հիվանդացության ցուցանիշների վերլուծությունից պարզվել է, որ քաղաքացիների դիմելիության ցուցանիշը՝ կապված «շան կծած» դեպքերով 2019 թվականի վերջերից կտրուկ ավելացել է։
«2018 թվականի նոյեմբերին 3 դեպք է գրանցվել, դեկտեմբերին նույնպես՝ 3, 2019 թվականի նոյեմբերին 12 դեպք, դեկտեմբերին՝ 12 դեպք, 2020 թվականի հունվարին՝ 5 դեպք»։
Կարդացեք նաև
Ըստ Արմեն Իսահակյանի, տարվա կտրվածքով ավելացել է նաև հակակատաղության սիճուկի ծախսը։
Հիվանդանոցի տնօրենը տեղեկացրեց նաև, որ հիվանդանոցի տարածքը վերածվել է շների հավաքատեղիի, թե՛ քաղաքացիները, և թե՛ գիշերային հերթափոխային գրաֆիկով աշխատող բուժանձնակազմի ներկայացուցիչները լեղապատառ են լինում։ Բացի այդ, թափառող շները հակահիգենիկ իրավիճակ են ստեղծում տարածքում․ աղբարկղերից աղբը վերցնում ու ցփնում են հիվանդանոցի շուրջբոլորը։
Նա աշխատակիցների խնդրանքով գրություն է ուղարկել Շիրակի մարզպետ Տիգրան Պետրոսյանին՝ խնդրելով միջնորդել գերատեսչական մարմիններին՝ խնդիրը կարգավորելու՝ մարդկանց անվտանգությունն ապահովելու հարցում։
Ի դեպ, Գյումրու քաղաքապետարանն էլ այսօր իր ֆեյսբուքյան էջում տեղեկացրել է․
«Շուրջ 20 օր է՝ ինչ Գյումրիում (համաձայն Գյումրի համայնքի հետ կնքված պայմանագրի՝ «My Vet» անասնաբուժական կլինիկան) կատարվում է անապաստան շների ստերջացման աշխատանքներ: Քաղաքում արդեն կան շուրջ 50 վիրահատված շներ, որոնց հնարավոր է ճանաչել ականջներին դակված տարբերանշաններով: Հորդորում ենք նրանց նկատմամբ ցուցաբերել բարյացակամություն, հնարավորության դեպքում կերակրել, նրանք բացարձակապես անվնաս են:
Դիմում ենք, մասնավորապես այն շնատերերին, ովքեր ունեն ցեղական տեսակի շներ՝ խստագույնս պահպանեն անվտանգության կանոնները (դնչկալ, շղթա (поводок) և չփորձեն թույլ տալ հարձակում վիրահատված շների վրա, այլապես օրենքով սահմանված կարգով կենթարկվեն պատասխանատվության»:
Նշենք, սակայն, որ այսօր Ազատանի համայնքապետ Վարդան Իկլիկյանը իր դժգոհություն էր հայտնել Aravot.am-ին առ այն, որ ստերջացումը հարցի լուծում չէ, քանի որ ստերջացումից հետո առաջարկում են շներին նորից փողոց բաց թողնել, որի դեպքում նորից կհարձակվեն մարդկանց վրա, հակահիգենիկ միջավայր կստեղծեն։ Ըստ պաշտոնյայի,օրենքի ընդունումից հետո հարկավոր է պետական բյուջեից միջոցներ տրամադրել ու շներին հատուկ վայրերում պահել։
Գյուղապետի դժգոհելով, բանը հասել է նրան, որ գյուղաբնակները, որոնցից շատերի զուգարանները տան ներսում չեն, վախենում են գիշերով զուգարան գնալ։
Նունե ԱՐԵՎՇԱՏՅԱՆ
Ցանկացած պնդում ճշմարիտ է, երբ ունի ստատիստիկ հիմք։ Հիմա պետք է ներկայացնել նաև, թե գյուղերում և քաղաքներում քանի շուն կա և քանիսը դրանցից երբեք չեն կծել ոչ մեկին։