Գյումրեցի ռեփեր եւ բիթբոքսեր Ալբերտ Գեւորգյանը հանդես է գալիս նոր կերպարով եւ «Թափառողը» նոր ալբոմով: Aravot.am-ի հետ զրույցում ռեփերը, որն արդեն նոր WANDER բեմական անուն ունի, ասաց, որ ալբոմում զետեղվելու է 8 երգ, որոնցից մեկն էլ «Գիրք» ստեղծագործությունն է: Այն հայ-ֆրանսիական համագործակցության արդյունք է:
Խոսելով նոր երգի մասին, WANDER-ը հայտնեց, որ գյումրեցի մի երիտասարդ Աշոտ անունով, որն ապրում է Ֆրանսիայում, լսել է իր մասին ու առաջարկել համատեղ հանդես գալ: Այնուհետեւ եկել է Գյումրի ու միասին ստեղծել են «Գիրք» կոչվող երգը, որն ամռանն են ձայնագրել: Այն երկլեզու է` հայերեն եւ ֆրանսերեն ռեփ:
WANDER-ն ասաց, որ հնարավոր է այլ համատեղ գործեր էլ ծնվեն, եթե ֆրանսաբնակ գյումրեցի երիտասարդը նորից գա Գյումրի:
Մեր զրուցակիցը, որ հեղափոխության օրերին այդ շնչով էր ռեփ կարդում եւ հեղափոխության երգիչ էր ընկալվում Գյումրիում, ասաց, որ իր երգերի տրամաբանության մեջ այժմ էլ ոչինչ չի փոխվել:
Կարդացեք նաև
Հավելեց, որ ամեն երգիչ հետո ավելի է կատարելագործվում: Ինչ վերաբերում է այն հարցին, արդյոք ներքաղաքական վիճակն ազդեցություն է ունենում իր երգերի վրա, ասաց, որ ազդեցություն թողնում է այն մարկանց վրա, որոնք նախկինում չեն խոսել, իսկ հիմա սկսել են շատ խոսել: «Ես միշտ եղել եմ անկեղծ, երգերը սրտիցս են բխել, ու միշտ լավատես եմ եղել: Եվ երբ զգացել եմ, որ երգ պիտի գրվի, գրել եմ»,-ասաց նա:
Գոհար ՀԱԿՈԲՅԱՆ
Լուսանկարները տրամադրել է WANDER-ը:
