Աշխարհի մի շարք թանգարաններ կարելի է նաեւ առցանց այցելել: Այս մասին հայտնում է design-mate-ru-ն: Կայքը գրում է, որ վիրտուալ արխիվները հարմար են ոչ միայն այցելուների, այլեւ հենց թանգարանների համար՝ բոլոր, անգամ պահոցներում եղած ցուցանմուշները ներկայացնելու առումով:
Վիրտուալ այցելության հնարավորությամբ թանգարաններից մեկն Էրմիտաժն է: Այստեղ ամփոփված են երեք միլիոնից ավելի արվեստի գործեր՝ այդ թվում իտալացի, հոլանդացի, ռուս եւ ֆրանսիացի վարպետների գլուխգործոցներ:
1753 թվականից Բրիտանական թանգարանում են պահվում արվեստի բացառիկ նմուշներ: Ութ միլիոն ցուցանմուշներից երեք ու կես միլիոնն արդեն հայտնվել են թանգարանի թվայնացված արխիվում: Անվճար գրանցվելու եւ հաշիվ ունենալու դեպքում հնարավոր է այդ ցուցանմուշներից որոշները դիտել նաեւ 3D ձեւաչափով:
Կարդացեք նաև
Ովքեր երբեւէ չեն եղել Լուվրում, հոգ չէ: Այժմ դա կարող են անել նաեւ առցանց:Ավելի քան 300 000 ցուցանմուշներից թվայնացված է 35 000-ը: Ջոկոնդան եւ Միլոսյան Վեներան եւս հասանելի են:
Ուշագրավ է նաեւ հանրահայտ Պրադոյի հավաքածուն: Այստեղ կարելի է զմայլվել Վելասկեսի, Գոյայի, Էլ Գրեկոյի գլուխգործոցներով: Ամեն առնցանց ցուցանմուշի հետ միասին թանգարանի կողմից նաեւ փոքրիկ հաղորդագրություն է ներկայացվում :
Ալբերտի եւ Վիկտորիայի թանգարանը պակաս հետաքրքիր չէ: Շատ դիզայներներ, նկարիչներ եւ մոդելյորներ երազում են տեսնել իրենց աշխատանքներն այս թանգարանի պատերին:Վերջինիս հսկայածավալ հավաքածուն այս պահին թվայնացման փուլում է եւ առնցանց հասանելի է ցուցանմուշներից 500 000 -ը:
Առցանց կարելի է այցելել նաեւ Նյու Յորքի ժամանակակից: Մանհեթընում տեղակայված այս հրաշալի հաստատությունը ժամանակակից հեղինակների աշխատանքների ուշագրավ հարթակ է: Այստեղ ամփոփված է 10 000 հեղինակների ավելի քան 200 000 աշխատանք:
Վիեննայի արվեստի պատմության թանգարանը թվայնացրել է ավելի քան 11 000 ցուցանմուշ ու մոնիտորի առաջ նստած սովորական բջջային հեռախոսի միջոցով կարող եք հիանալ այդ գլուխգործոցներով:
Ուֆիցին Եվրոպայի լավագույն թանգարաններից է, որը նույնպես հնարավորություն է տալիս առցանց դիտել իր չքնաղ հավաքածուն: Թանգարանի ղեկավարությունն արդեն հայտարարել է, որ այս տարի կթվայնացնի Հին Հունաստանի եւ Հին Հռոմի բոլոր 1250 նմուշները նույնպես:
Հոդվածն ամբողջությամբ՝ design-mate-ru-ում:
Պատրաստեց Գոհար ՀԱԿՈԲՅԱՆԸ
Լուսանկարները՝ Էրմիտաժի եւ Ուֆիցի թանգարանի կայքերից:
