Fitch վարկանշային միջազգային գործակալությունը վերանայել է Հայաստանի կառավարության արտարժույթով, ինչպես նաև ազգային արժույթով երկարաժամկետ պարտավորությունների թողարկման սուվերեն վարկանիշները` դրանք պահպանելով «BB-» մակարդակի վրա, «դրականը» փոխարինելով «բացասական» հեռանկարով:
Գործակալության հայտարարության մեջ նշվում է, որ կորոնավիրուսը բացասական է ազդում Հայաստանի տնտեսության վրա` հաշվի առնելով վերջինիս կախվածությունը ներմուծումից, Ռուսաստանի տնտեսությունից (մասնավոր փոխանցումների, առեւտրի և ներդրումների առումներով) և զբոսաշրջությունից: Fitch-ի կանխատեսման համաձայն` Հայաստանը բախվելու է պետական պարտքի աճի` չնայած մակրոտնտեսական քաղաքականությանը և շարունակական բարեփոխումների: Գործակալությունում կարծում են, որ Հայաստանի ՀՆԱ-ի աճը նվազելու է 2019-ի 7.6%-ից մինչև 0.5%` կորոնավիրուսով պայմանավորված: Fitch-ը կանխատեսում է, որ ՀՆԱ-ի աճը մասամբ կվերականգնվի 2021-ին՝ մինչև 5.5%։ Միևնույն ժամանակ նշվում է, որ Հայաստանում իրավիճակը կախված կլինի աշխարհում համավարակի ընթացքից, եթե վարակի երկրորդ ալիք բռնկվի, տնտեսական և ֆիսկալ կանխատեսումները կարող են էականորեն փոխվել:
Գործակալության կանխատեսումների համաձայն` ընդհանուր պետական պարտքը 2020-ին 53.6%-ից կաճի մինչև 59.2%, իսկ 2021-ին կիջնի 56.0%: Նշվում է նաև, որ կորոնավիրուսի շոկի հետևանքով կթուլանան բանկային ոլորտի հիմքերը: Բացի այդ ստեղված իրավիճակը մեծացրել է արտաքին ռիսկերը ՀՀ տնտեսության համար: Fitch- ի կանխատեսումներով` երկրի ընթացիկ հաշվի դեֆիցիտը կշարունակի բարձր մնալ` 8% 2020-ին, 8.1% 2021-ին` ՀՆԱ հարաբերակցությամբ:
Fitch-ը ենթադրում է, որ Հայաստանը կշարունակի ունենալ հասարակական և քաղաքական կայունություն, իսկ արցախյան հակամարտությունը չի հասնի այն մակարդակին, որ ազդի երկրի տնտեսական և ֆինանսական կայունության վրա:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ