Ինչպես հայտնել էինք, վարչապետ Նիկոլ Փաշինյանն այսօր ուղիղ եթերով ասաց, որ ապրիլի 5-ին ունեցել ենք կորոնավիրուսի թեստավորման 263 դեպք, որոնցից դրական է եղել միայն 11-ը, եւ եթե այս դրական զարգացումը շարունակվի, կմտածեն պարետատան սահմանափակումները թուլացնելու ուղղությամբ:
«Իրավունք եմ վերապահում խնդրելու, որ այս շաբաթվա ընթացքում ավելի նախանձախնդրորեն փորձեք պահել սահմանափակումները: Այսօրվա տվյալները մեզ հուսադրում են, բայց վստահ չենք: Եվս մի շաբաթ առավելագույնս խիստ գտնվենք ինքներս մեր հանդեպ, պահենք սահմանափակումները»,-քաղաքացիներին կոչ արեց նա:
Վարչապետի խոսքով. «Եթե մեր կանխավարկածն արդարանա, կնշանակի, որ երկուշաբթիից հնարավորություն կունենանք մտածելու ռեժիմի թուլացման մասին: Եթե այս դինամիկան պահպանվի, կնշանակի, որ համաճարակի ողնաշարը ջարդել ենք, որ կսկսենք բնականոն կյանքին վերադառնալու մասին մտածել»:
Կարդացեք նաև
Հնարավոր է՝ լավ լուր ունենք կորոնավիրուսի հաղթահարման մասով։ Նախորդ օրվա 263 թեստերից դրական է ընդամենը 11-ը, այսինքն՝ միայն 11 մարդու մոտ է կորոնավիրուսը հաստատվել:
Gepostet von Nikol Pashinyan / Նիկոլ Փաշինյան am Sonntag, 5. April 2020
Փաշինյանն այնուհետեւ նշեց՝ ցավոք, եւս մեկ մահվան դեպք է գրանցվել. «68 տարեկան քաղաքացին ունեցել է երկկողմանի թոքաբորբ, որը, ենթադրաբար, կորոնավիրուսի հետեւանք է: Ունեցել է նաեւ դիաբետ, զարկերակային հիպերտենզիա, ուղեղի արյան շրջանառության սուր խանգարում: Կրկին գործ ունենք դեպքի հետ, երբ քրոնիկ հիվանդություններն իրենց գործն անում են»:
Փաշինյանը նաեւ հայտնեց, որ այսօր 18:30-ին ուղիղ միացմամբ մոտ երեք ժամ պատասխանելու է քաղաքացինեի հարցերին:
Լուիզա ՍՈՒՔԻԱՍՅԱՆ
