«Ինքնամեկուսացվել է մոտ 7000 անձ: Մի մասը տարբեր ժամանակներում դուրս է եկել, մի մասը վերադարձել է ինքնամեկուսացման: Մոտ 400 խախտում է արձանագրվել, բացատրություն են տվել ոստիկանությունում, թե ուր են գնացել»,- այսօր ԱԺ հատուկ նիստում ասաց փոխվարչապետ Տիգրան Ավինյանը:
Հիշեցնենք, որ Ազգային ժողովը հատուկ նիստ է հրավիրել՝ արտակարգ դրության ժամկետը, իրավական ռեժիմը երկարաձգելու հարցով: Նման որոշում էր կայացրել կառավարությունը:
«Իմ քայլի» պատգամավոր Համազասպ Դանիելյանը հարցրեց՝ կա՞ն կարմիր գծեր, որոնց հատելու դեպքում հնարավոր է խոսքի ազատության սահմանափակումների վերադառնալ: Ավինյանը պատասխանեց, որ իհարկե, կան, այդ կարմիր գծերը ստեղծվել են արտակարգ դրության նախորդ որոշմամբ, որ վարակակիրների տվյալների վերաբերյալ ապատեղեկատվություն չհրապարակեին, մանիպուլյացիաների չտրվեին. «Մենք հուսով ենք, որ ԶԼՄ-ները եւ առհասարակ հասարակությունը բավականին օբյեկտիվ է գնահատում իրավիճակը ու պաշտոնական տեղեկատվության նկատմամբ կա մեծ վստահություն ու մենք այս պահին ռիսկ չենք տեսնում, որ ԶԼՄ-ները ակտիվ ապատեղեկատվություն կփորձեն տարածել: Եթե նման ռիսկ առաջանա, մենք կվերանայենք որոշումը:
Փոխվարչապետը տեղեկացրեց, որ հաջորդ շաբաթվանից, կախված, իհարկե, այս շաբաթվա արդյունքներից, նախատեսում են մշակող արդյունաբերության մեջ թույլատրել հագուստի արտադրությունը, ապրիլի 20-ից, 30-ից նախատեսում են մանրածախ առեւտրի որոշ տեսակներ թույլատրել, անշարժ գույքի գործունեությունը թույլատրել, գիտահետազոտական մշակումների աշխատանքները թույլատրել, սա այն դեպքում, եթե հաջողվի վարակման ինտենսիվությունը կառավարել: Եթե նույնիսկ այս ոլորտների գործունեությունը թույլատրվի, գործելու է հերթափոխով աշխատելու, միմյանցից հեռավորություն պահելու, ձեռնոցով ու դիմակով աշխատելու տրամաբանությունը:
Կարդացեք նաև
«Իմ քայլի» պատգամավոր Բաբկեն Թունյանը հարցրեց. «Դուք գրառում էիք արել, որ վարակման ցուցանիշը 2-ից ավելիից հաջողվել է իջեցնել 1,4-ի մակարդակի: Այսինքն, եթե նախկինում միջինում 2 հոգու էր վարակում, հիմա 1,4 էր, այսօր ձեր տվյալներում 0.8 էր, այսինքն՝ մեկից ցածր»: Թունյանը հարցրեց, թե ավելի լավ ցուցանիշի ե՞րբ կհասնենք: Ավինյանը պատասխանեց, որ նախորդ կիրակի օրվա դրությամբ գործակիցը 0.7 էր հասել, դրանից հետո հասարակության մոտ հանգստություն եղավ, տեղաշարժն աճեց: Այդ ցուցանիշը փոխվում է՝ մարդկանց տեղաշարժի դինամիկայով կախված: Դա հաշվարկում են օպերատորներից ստացած ագրեգացված տվյալների հիման վրա. «Հուսով ենք, որ մինչեւ ապրիլի 20-ը կկարողանանք վարակի տարածման ինտենսիվությունը պահել 1-ից ցածր ցուցանիշի վրա ու շուտով կարձանագրենք ավելի քիչ վարակման դեպքեր, քան նույն օրում բուժման դեպքերը ու մարման միտումներ կտեսնենք: Սա չի բացառում, որ անզգույշ քայլերի դեպքում վարակի տարածումը կրկին բռնկվի: Մենք փուլ-փուլ ու դանդաղ ենք գնալու ազատականացումների հենց այդ պատճառով»:
Իմ քայլից Արտակ Մանուկյանը հարցրեց. «Եթե զանգի բովանդակությունը դիտարկում ենք, ասում են՝ դուք հնարավոր է շփվել եք մի անձի հետ, որը հնարավոր է վարակված լինի: Հնարավոր չի՞ օր ասեն՝ այսինչ օրը շփվել եք, մարդը կնայի, կհիշի, որ չի շփվել, հանգիստ կքնի այդ օրը»: Ավինյանը պատասխանեց, որ խուճապն ավելի կնվազեցնի ռիսկերը, մարդը, գիտակցելով, որ ինքը ունեցել է պոտենցիալ շփում վարակակրի հետ, կինքնամեկուսանա: Մենք կարող ենք մի փոքր փոխել տրամաբանությունը, արդեն իսկ նախատեսում ենք անհատական աշխատանք վարակակրի հետ»:
Ավինյանը նաեւ բացատրեց, թե ինչպես է դա արվում. «Մեկ-երկու օրում այն տեղորոշված մարդկանց, ում չենք զանգել, կզանգենք ու հստակ կանոնակարգված կունենանք ցանկը, ովքեր պոտենցիալ պետք է ինքնամեկուսացվեն: Եթե քաղաքացին զանգ է ստացել ու իրեն ասվել է՝ դու պոտենցիալ շփվել ես վարակակրի հետ ու հետո որեւէ այլ զանգ չի ստացել, դա նշանակում է, որ այս փուլում ինքը դեռեւս կարող է վարակակրի հետ շփվել է: Մենք կկանոկարգենք ու միանգամից անձին կզանգենք կասենք՝ դու շփվել ես վարակակրի հետ, եղբայր կամ քույր իմ»:
Հռիփսիմե ՋԵԲԵՋՅԱՆ
