Հարգելի պարոն Վարդազարյան, Ձեզ ենք դիմում այն երկու տասնյակ դատապարտյալների անունից, որոնց պատժի կրումից պայմանական վաղաժամկետ ազատվելու գործերը գտնվում են Արմավիրի մարզի ընդհանուր իրավասության դատարանում` տարբեր դատավորների վարույթում: Արդեն տեւական ժամանակ է, ինչ ՀՀ ոստիկանության ուղեկցող խումբը դատապարտյալներին չի տեղափոխում դատարան, նշելով, որ ըստ գործող կանոնակարգի եւ համապատասխան ենթաօրենսդրական ակտերի, պետք է նրանք ուղեկցեն ձերբակալվածներին եւ կալանավորված անձանց: Սակայն նշենք, որ միշտ դատապարտյալներին անհրաժեշտության դեպքում դատարան է տարել ոստիկանության ուղեկցող գունդը:
ՀՀ Սահմանադրության 13-րդ հոդվածի համաձայն, դատապարտյալն ունի անկախ եւ անաչառ դատարանի կողմից իր գործի արդարացի, հրապարակային եւ ողջամիտ ժամկետում քննության իրավունք: Սակայն, մեզ դատարան չտանելով`դատավորները ստիպված հետաձգում են դատական նիստերը, նշանակելով դրանք մեկ այլ օր: Փաստորեն, խախտվում է ողջամիտ ժամկետը:
Խնդրում ենք Ձեզ, մինչեւ օրենսդրական բացը լրացնելը, եւ հարցին համակարգային լուծում տալը, նման նիստերը հնարավորության դեպքում անցկացնել արտագնա` ՔԿՀ-ներում, ինչը կարծում ենք օրենքով արգելված չէ:
Նշենք, որ նախկինում, մինչեւ սույն թվի մայիս ամիսը, նման նիստեր «Արմավիր» ՔԿՀ-ում անցկացվել են:
Կարդացեք նաև
Մեկ անգամ եւս խնդրում ենք Ձեզ, հնարավորինս սեղմ ժամկետում կարգավորել խնդիրը, քանի որ ազատությունը մարդու հիմնարար իրավունքներից է, եւ փաստորեն, ըստ էության, խախտվում է մեր իրավունքը:
ՍԻՄՈՆՅԱՆ ՎԱՐԴԱՆ
ԴԱՎԹՅԱՆ ԱՐՄԵՆԱԿ
ՀԱԿՈԲՅԱՆ ՍԱՐԳԻՍ
ՀՈՎՍԵՓՅԱՆ ԱՐԱՄԱՅԻՍ
«Առավոտը» հարցի կապակցությամբ ստացել է թե ՄԻՊ-ի, թե՛ ՀՀ ոստիկանության, թե՛ ՔԿՀ պարզաբանումները, դիմել է նաեւ ԲԴԽ, սակայն մինչ օրս պատասխան չկա:
«Առավոտ» օրաթերթ
01.08.2020
