«Երկարատև ժամանակահատված ժողովրդին և քաղաքացուն անտեսելը թույլ չի տալիս իրենց (նախկին իշխանություններին- խմբ.) հասկանալ, որ դա ժողովրդի և քաղաքացու պահանջն էր, և մերժելը գալիս էր այդտեղից։ Եվ անգամ, եթե հասկացել են, դժվար է գնալ ժողովրդի և քաղաքացու դեմ»,- օգոստոսի 28-ին «Մեդիա կենտրոնում» ասաց «Բաց հասարակության հիմնադրամներ» Հայաստանի կազմակերպության հիմնադիր տնօրեն Լարիսա Մինասյանը։
Նրա կարծիքով՝ դժվար է ժողովրդի կողմից վստահելի, լեգիտիմ իշխանությանը թիրախավորել։ Այդ պատճառով էլ, ըստ նրա, սկսվել է պրոքսի պատերազմ, որը սկզբից կարծում էին, որ անհեռանկար է, սակայն այժմ տեսնում են, որ տարածքներ կարող է գրավել։
Լարիսա Մինասյանն անդրադարձավ այն տեսակետին, որ «Բաց հասարակության հիմնադրամները» Հայաստանում գործել է նաև նախկին իշխանության օրոք, սակայն չի թիրախավորվել․ «Կարիքը չունեին։ Իրենց ավտորիտար համակարգով այնքան ուժեղ էր վերահսկողությունը, որ նրանք գիտեին, որ կարող են թողնել, չփակել՝ ոնց որ է՛լ ավելի ավտորիտար պետությունները՝ Թուրքիան, Ադրբեջանը, Բելառուսը, Ուզբեկստանը, արեցին քաղաքացիական հասարակության մեծ զանգվածի և հիմնադրամի հետ։ Բայց և՝ անտեսել, չանել։ Իրենց ժողովուրդն այնքան ․․․ ոնց որ ժողովուրդն է ասում՝ խաչն իմն է, զորությունը ես գիտեմ, բայց հիմա կա մի իշխանություն, որը հռչակել է այդ արժեքները՝ ունենալով իշխանություն՝ կարող է իրականացնել, և դա մահացու վտանգ է այն ռեժիմի համար»։
Ամի ՉԻՉԱԿՅԱՆ
