«Մենք սահման բացելու գործառույթ չենք իրականացնում կամ որոշում, թե Ռուսաստանն ում ներս թողնի, ում՝ չէ: Մենք սփյուռքով ենք զբաղվում՝ Հայաստան-սփյուռք կապերով, քաղաքացիները պետք է պարետատուն, արտգործնախարարարություն դիմեն»,-այսօր այսպես պատասխանեց Ռուսաստանի Դաշնություն մեկնել ցանկացող քաղաքացիներին Սփյուռքի հարցերով հանձնակատար Զարեհ Սինանյանը, որոնք կառավարության դիմաց բողոքի ցույց էին անում:
Հարցին՝ մարդիկ եկել են Հայաստան եւ չեն կարողանում վերադառնալ իրենց ընտանիքների մոտ, կառավարությունն ի՞նչ է անում, պարոն Սինանյանը պատասխանեց՝ բայց չէ՞ որ այդ մարդիկ չեն կարողանում վերադառնալ օբյեկտիվ՝ COVID-ի պատճառով, բայց, կառավարությունը բանակցություններ է վարում. «Համոզված եմ, որ ինչ-որ բան արվում է»:
Հիշեցնենք, որ արդեն որերորդ անգամ Ռուսաստանի Դաշնություն մեկնել չկարողացող քաղաքացիները, որոնք արդեն 6 ամիս է Հայաստանում են եւ փակ սահմանների պատճառով չեն կարողանում երկրից դուրս գալ, կառավարության առաջ բողոքի ցույց են անում՝ պահանջելով բանակցել ռուսական կողմի հետ ու սահմանները բացելու վերաբերյալ ինչ-որ համաձայնության գալ:
Լուսինե ԲՈՒԴԱՂՅԱՆ
