Երևանի ընդհանուր իրավասության դատարանի Շենգավիթի նստավայրում սահմանադրական կարգի ենթադրյալ տապալման գործով դատական նիստի ընթացքում գործով ամբաստանյալներ Ռոբերտ Քոչարյանի, Սեյրան Օհանյանի, Յուրի Խաչատուրովի պաշտպանները բացարկ ներկայացրին մեղադրող դատախազներ Գևորգ Բաղդասարյանին, Պետրոս Պետրոսյանին և ՀՀ գլխավոր դատախազ Արթուր Դավթյանին:
Ռոբերտ Քոչարյանի պաշտպանական թիմի անդամ Հայկ Ալումյանը բացարկ հայտնեց միայն Արթուր Դավթյանին ու հայտարարեց. «Մեղադրող Արթուր Դավթյանը պարոն Նիկոլ Փաշինյանի նկատմամբ դրսևորում է ենթակային բնորոշ վարքագիծ: Բացառում եմ այս գործով Դավթյանին որպես մեղադրող մասնակցությունը: Միջնորդում եմ նրան հեռացնել սույն գործով վարույթից»:
Ռոբերտ Քոչարյանի պաշտպանական թիմի անդամ Արամ Վարդևանյանը բացարկ ներկայացրեց մեղադրող դատախազ Գևորգ Բաղդասարյանին ու վստահեցրեց. «Գևորգ Բաղդասարյանն ունի կանխակալ վերաբերմունք: Նրա գործողությունները սկսած 2019-ից թույլ չեն տալիս, որ անաչառ դիտորդի մոտ տպավորություն առաջանա, որ նա կարող է լինել անկողմնակալ: Նա հայտարարեց, թե Շուշին ազատագրելու համար ոչ ոք նստած չէ: Հիմա Շուշին հանձնված է, բա հիմա իր մոտեցումն ինչո՞ւ չի արտահայտում, որո՞նք են նրա քայլերը»:
Hearings of the RA Second President Robert Kocharyan’s case took place at the Court of General Jurisdiction of Shengavit Administrative District
Դատախազ Գևորգ Բաղդասարյանը, դիմելով Արամ Վարդևանյանին, հորդորեց ուշադիր լինել իր տոնայնության հարցում:
Կարդացեք նաև
Յուրի Խաչատուրովի շահերի պաշտպան Միհրան Պողոսյանի ելույթը նախագահող դատավոր Աննա Դանիբեկյանը սահմանափակեց այն ժամանակ, երբ նա օգտագործեց «խաբեբա Նիկոլ Փաշինյան» արտահայտությունը: Նա հրաժարվեց խոսափողը փոխանցել կարգադրիչին՝ պատճառաբանելով, թե հիմնավորեք՝ ինչո՞ւ է նախագահողը սահմանափակում: Աննա Դանիբեկյանը Միհրան Պողոսյանի նկատմամբ կիրառեց դատական սանկցիա՝ նկատողություն: Փաստաբանն ասաց, որ իր իրավունքները խախտվում են, և թույլ չեն տալիս, որ պատշաճ իրականացնի Յուրի Խաչատուրովի պաշտպանությունը:
Մեղադրող դատախաղ Գևորգ Բաղդասարյանը, անդրադառնալով ՀՀ գլխավոր դատախազ Արթուր Դավթյանի՝ վարչապետից կախյալ լինելու մասին հայտարարություններին, ասաց. «Գլխավոր դատախազին որևէ մեկը չի տալիս հանձնարարություններ ու չի կարող տալ: Գլխավոր դատախազի մասնակցությունն ընդհանուր բնույթի քննարկումներին չի կարող կախյալ վարքագծի մասին խոսել»:
2018-ից հետո իր կարգավիճակի առաջընթացի մասին դիտարկումներին ի պատասխան Գևորգ Բաղդասարյանն ասաց՝ 2018-ին, երբ նշանակվել է Երևան քաղաքի դատախազ, դրանում իր կարգավիճակի փոփոխություն չի եղել: Այնուհետև իր ելույթում, երբ ասաց, որ Շուշին հանձնողներին չի պաշտպանում, դահլիճից մեկն ասաց՝ Շուշին հանձնողներից մեկը դու ես: Դատախազը պահանջեց պարզաբանում:
ՀՀ երկրորդ նախագահ Ռոբերտ Քոչարյանը ևս մեկ անգամ հայտարարեց. «Շուշին հանձնողներից մեկը հենց դու ես»: Ի պատասխան Գևորգ Բաղդասարյանն ասաց. «Հանձնողը հենց դուք եք: Ինչի ես հող հանձնո՞ղ եմ»: Արամ Վարդևանյանն էլ, դիմելով Գևորգ Բաղդասարյանին, նշեց. «Ինչի՞ ես գոռում, ես էլ գոռա՞մ»: Նախագահող դատավորը հորդորեց վիճաբանությունը դադարեցնել: Արամ Վարդևանյանը, դիմելով նախագահող դատավորին, վրդովվեց. «Պողոսյան Միհրանի հանդեպ մի վայրկյանում սանկցիա կիրառեցիք, ինչ է, թե Բաղդասարյան Գևորգն ասաց»: Նախագահող դատավորը որոշեց նիստը կես ժամով ընդմիջել:
Տաթև ՀԱՐՈՒԹՅՈՒՆՅԱՆ
