Արտյոմ Ավագյանը ծնունդով Ստեփանակերտ քաղաքից է: Այս հերոս երիտասարդին կյանքն իր լայն թևերով գրկել էր, տվել արժանի կեսին՝ Անիին, երբ անսպասելիորեն պատերազմն իր չարագույժ տերևաթափը սկսեց՝ ընդհատվեց նրանց երկրային կապը:
Արտյոմը 2014թ. պարտադիր ժամկետային զինվորական ծառայության է անցել Ֆիզուլիում։ Զորացրվել է 2016 թ. ավագ սերժանտ կոչումով: Ծառայության ընթացքում արժանացել է պարգևների և շնորհակալագրերի։ Մասնակցել է ապրիլյան քառօրյա պատերազմին։ Գերազանց ավարտել ՀԱԱՀ «ֆինանսներ» բաժինը, ՄՄՀ մագիստրատուրայի իրավագիտության բաժնի 2-րդ կուրսի ուսանող էր։
Նա առաջիններից էր, որ 2020թ. սեպտեմբերի 27-ին կամավոր մեկնել է դիրքեր՝ մասնակցելով Ֆիզուլիում ընթացող մարտերին՝ որպես ավագ սերժանտ, ավագ հետախույզ և գնդացրորդ։
Մարտական ընկերները միայն շնորհակալություն են հայտնում նման ընկեր ունենալու համար: Նա տարբերվող էր: Օգնում էր բոլորին, բավականին հավասարակշռված ու զուսպ էր: Նույնիսկ իր անչափելի մարդասիրության մասին կարող ենք պատկերացում կազմել ընկերների պատմածներից, որ իր կյանքը զոհելով փրկել է շատ ու շատ վիրավորների կյանքներ, հանել զոհվածների դիերը:
-Անվախ էր: Ամեն ինչ փորձում էր անել հետագայում բարեկեցիկ կյանք ունենալու համար ,-ասում է Արտյոմի ընտրյալը՝ Անին:
Հարց ու փորձ արեցինք՝ հասկանալու, թե բնավորության և մարդկային կերպարին բնորոշ ինչ հատկանիշներ ուներ Արտյոմը: Ասում են, որ նաև շատ աշխատասեր էր և արդար: Ամեն ինչի մեջ արդարն էր գերադասում:
Ահա այսպես էլ Հայրենիքի համար արդար պայքարում գերադասեց իր կյանքը նվիրել՝ հանուն այսօրվա և վաղվա:
Շատ էր սիրում Անիին ու հաճախ էր սիրո խոսքեր շռայլում:
Հիմա Անիի ականջը ձայնի է սպասում, իր Արտյոմի ձայնին…
-Մի անգամ աչքերն արցունքոտված խոստովանել է, որ առանց ինձ չի կարող ապրել և իմ դեմքին միայն ժպիտ է ուզում տեսնել, որովհետև ինքն իրեն է դա խոստացել: Այս խոսքերը ամեն օր եմ հիշում ,- պատմում է Անին:
Ասում է, որ Արտյոմի հետ անցկացրած ամեն օր իր տեսակի մեջ անկրկնելի ու անմոռանալի էր:
-Ես շնորհակալ եմ Աստծուն, որ իմ կյանքում երբևէ առիթ եմ ունեցել նման մարդու հանդիպելու,-ասում է զրուցակից՝ շարունակելով,-և խոստանում եմ իմ հերոս կեսի հիշատակը միշտ կպահեմ ու իր թողած կյանքը պատվով կապրեմ:
Վովա ԱՐԶՈՒՄԱՆՅԱՆ
