Արդարադատության նախարարությունը շրջանառության մեջ է դրել մի նախագիծ, որով նախատեսվում է պետական եւ հանրային պաշտոնյաներին վիրավորելը կամ զրպարտելը քրեականացնել։
Նախարարությունն առաջարկում է Քրեական օրենսգիրքը լրացնել հետեւյալ բովանդակությամբ 3171 հոդվածով.« Հանրային ծառայության մեջ գտնվող անձին վիրավորելը կամ զրպարտելը` Հանրային ծառայության մեջ գտնվող անձին վիրավորելը կամ զրպարտելը` կապված նրա կողմից իր ծառայողական պարտականությունները կատարելու հետ`պատժվում է տուգանքով` նվազագույն աշխատավարձի հարյուրապատիկից հինգհարյուրապատիկի չափով: Սույն հոդվածի առաջին մասով նախատեսված արարքը, որը կատարվել է զանգվածային լրատվության միջոցներով կամ հրապարակային այլ եղանակով՝ կապված նրա կողմից իր ծառայողական պարտականությունները կատարելու հետ`պատժվում է տուգանքով` նվազագույն աշխատավարձի հինգհարյուրապատիկից երեք հազարապատիկի չափով կամ ազատազրկմամբ՝ առավելագույնը երկու տարի ժամկետով»:
Իսկ 316-րդ հոդվածի 3-րդ մասը նախարարությունն առաջարկում է շարադրել հետեւյալ խմբագրությամբ՝ «3. Սույն օրենսգրքում իշխանության ներկայացուցիչ է համարվում պետական եւ տեղական ինքնակառավարման մարմիններում ծառայող այն անձը, ով ծառայողական ենթակայության տակ չգտնվող անձանց նկատմամբ սահմանված կարգով օժտված է կարգադրիչ լիազորություններով, իսկ սույն հոդվածում իշխանության ներկայացուցիչ է համարվում նաեւ «Հանրային ծառայության մասին» օրենքով պետական կամ համայնքային քաղաքական, վարչական կամ ինքնավար պաշտոն զբաղեցնող անձը»:
Նշենք, որ «Հանրային ծառայության մասին» օրենքի 4-րդ Հոդվածը սահմանում է հանրային պաշտոնները․ «Հանրային պաշտոններն ընտրովի կամ նշանակովի պաշտոններ են, որոնք զբաղեցվում են քաղաքական գործընթացների, հայեցողական որոշումների, ինչպես նաեւ օրենքով նախատեսված այլ ընթացակարգերի արդյունքով: Այդ պաշտոնները զբաղեցնող անձինք իրենց լիազորությունների շրջանակներում անհատական կամ կոլեգիալ կարգով ընդունում են որոշումներ, պատասխանատվություն կրում իրենց կայացրած որոշումների համար, եթե օրենքով այլ բան նախատեսված չէ: 2. Հանրային պաշտոնը դասակարգվում է խմբերի՝ պետական եւ համայնքային: 3. Պետական պաշտոնները դասակարգվում են տեսակների՝ քաղաքական, վարչական, ինքնավար եւ հայեցողական: 4.Համայնքային պաշտոնները դասակարգվում են տեսակների՝ քաղաքական, վարչական եւ հայեցողական»:
Կարդացեք նաև
Նելլի ԲԱԲԱՅԱՆ
