«Պարոն Փաշինյան, վեց ամիս առաջ ձեզ հարցրի, թե դիմակ չկրելու տուգանքները որքանո՞վ են կանխարգելում վիրուսի տարածումը եւ եթե պարզվի, որ դրանք արդյունավետ չէին, գումարները վերադարձվելո՞ւ են քաղաքացիներին, թե ոչ, պատասխանեցիք, որ ոչ․․․հիմա համատարած գրեթե բոլորը դիմակ չեն կրում, նստում են տրանսպորտ, գալիս հավաքների, այդ թվում՝ ձեր հրավիրած։ Եւ դա ոստիկանների ներկայությամբ, որոնք մեկ օրում մոտ յոթանասուն հազար դոլարի տուգանք էին գրում։ Հիմա ի՞նչ է փոխվել, վիրուսն էլ չկա՞, տուգանքներն արդյունավետ չէի՞ն»,-ԱԺ-կառավարություն հարցուպատասխանի ժամանակ այսօր վարչապետ Նիկոլ Փաշինյանին հարցրեց «Լուսավոր Հայաստանի» պատգամավոր Հրանտ Այվազյանը։
Փաշինյանի փոխարեն հարցին արձագանքեց առողջապահության նախարար Անահիտ Ավանեսյանը։ «Դիմակների կրումը պահպանում է կանխարգելիչ միջոցառման դերը։ Ճիշտ եք նկատում, որ ցածր ցուցանիշները հանգստություն են առաջացնել մարդկանց մոտ եւ շատերը հետեւողականորեն էլ չեն դնում դիմակները, բայց վերջին երկու շաբաթում հիվանդացության աճ կա։ Խնդրանք եւ հորդոր՝ վերադարձեք դիմակների կրման ավելի խիստ եւ հետեւողական ռեժիմի»։
Լուիզա ՍՈՒՔԻԱՍՅԱՆ