Սոթքի հանքավայր տանող ճանապարհն այս պահին փակ է: Հանքի աշխատակիցները պահանջում են հանդիպում հանքը շահագործող՝ «Գեոպրոմայնինգ Գոլդ» ընկերության տնօրենի հետ, որի գրասենյակը Երեւանում է: Բանն այն է, որ հանքի աշխատակիցներն իրենց մի քանի ամսվա աշխատավարձերը պակաս են ստանում:
Խնդրին տեղեկացել է պատգամավոր Թագուհի Թովմասյանը:
Aravot.am-ի հետ զրույցում տիկին Թովմասյանն ասաց, որ կապի մեջ է բողոքի ցույցի դուրս եկած աշխատակիցների հետ: Ըստ պատգամավորի, աշխատակիցների բողոքներին ի պատասխան, հանքի տնօրինությունը հայտնել է, որ ոսկի քիչ են կորզում այդ պատճառով էլ աշխատավարձերը պակասեցրել են:
Կարդացեք նաև
«Աշխատակիցների խնդրանքը չի բավարարվել: Այս պահին աշխատակիցները պահանջում են, որ «Գեոպրոմայնինգ Գոլդ» ընկերության տնօրեն Անատոլի Գոգոտինը գնա եւ անձամբ պարզաբանումներ տա՝ ինչո՞ւ իրենք աշխատավարձը ոչ ամբողջական են ստանում: Եվ, օգտվելով առիթից, նաեւ կրճատված քաղաքացիներն են պարզաբանումներ պահանջում՝ ե՞րբ են հետ գալու աշխատանքի, որովհետեւ ասել են, որ դա ժամանակավոր լուծում է»,-մեզ հետ զրույցում ասաց պատգամավորը:
Թագուհի Թովմասյանն նաեւ ասաց, որ այս պահի դրությամբ ընկերության ներկայացուցիչները չեն մոտեցել աշխատակիցներին:
Ըստ նրա, խնդիրը ծագել է այն բանից հետո, երբ հանքի մի մասը, պատերազմից հետո, անցել է Ադրբեջանին:
Լուսինե ԲՈՒԴԱՂՅԱՆ
