Ինչպես արդեն տեղեկացրել ենք, միասնական քննությունները կմեկնարկեն հունիսի 8-ին, դրանք կանցկացվեն «մեկ բուհ, մեկ մասնագիտություն» սկզբունքով: Այս տարի մրցույթում փոփոխություն է կատարվել եւ հանվել առաջին հայտի գերակայությունը:
Այս տարի առաջին փուլում միասնական քննություն կհանձնի 11487 դիմորդ, ներբուհական քննություն կհանձնի 1899 դիմորդ: Այս մասին Aravot.am-ի հետ զրույցում հայտնեց ԳԹԿ փոխտնօրեն Կարո Նասիբյանը:
Կարո Նասիբյան
Նա ներկայացրեց նաեւ անվճար եւ վճարովի տեղերի թիվը: Ըստ այդմ` անվճար տեղերի թիվը 1824 է, վճարովի տեղերինը` 21820, այսինքն` դիմորդների թվից 2 անգամ ավելի տեղ կա:
«Դիմորդը բուհ ընդունվելու խնդիր չունի, եւ հիմնական մեխը, փոփոխությունը, որ մտածել էինք այս երկու տարվա ընթացքում, այն է, որ, օրինակ, 0,25 միավորով պատմաբանին դուրս չթողնես, ինչ է թե մեկ այլ դիմորդ, որ իրավաբանական էր դիմել, 0,25 միավոր ավել էր ստացել, քան պատմության ֆակուլտետ դիմածը: Սրանից ենք ուզում հրաժարվել վերջնականապես, որպեսզի ամեն մարդ իր սիրած մասնագիտությամբ սովորի»,-ասաց ԳԹԿ տնօրենի տեղակալը:
Կարդացեք նաև
Ի դեպ, այս տարի առաջին փուլով ԵՊՀ ժուռնալիստիկայի ֆակուլտետ է դիմել 101 դիմորդ, ինչը ԳԹԿ փոխտնօրենի ձեւակերպմամբ, վատ ցուցանիշ չէ:
Գոհար ՀԱԿՈԲՅԱՆ
Լուսանկարը՝ արխիվային
