Ինչպես Aravot.am-ին տեղեկացրեց Գնահատման եւ թեստավորման կենտրոնի մամուլի պատասխանատու Խաչանուշ Գրիգորյանը, հուլիսի 18-ին կհրապարակվեն մրցույթի արդյունքները, եւ բուհերում կկախվեն ցուցակները, իսկ դիմորդները հաղորդագրություն կստանան իրենց էլեկտրոնային հասցեներին:
«Դրական միավոր ստացած, սակայն մրցույթը չհաղթահարած դիմորդների համար հուլիսի 19-26-ը կազմակերպվելու է մրցույթի լրացուցիչ փուլ՝ 6 մասնագիտությամբ: Մրցույթը լինելու է ըստ հայտերի հերթականության՝ սկզբում անվճար տեղերի համար, եթե կան այդպիսիք, հետո՝ նույն մասնագիտության վճարովի տեղերի: Առավել բարձր միավորներ ունեցողները կընդունվեն, իսկ մնացածները կմասնակցեն երկրորդ հայտով նշված մասնագիտության մրցույթին, հետո՝ երրորդ, չորրորդ, և այդպես շարունակ»,-ասաց Խաչանուշ Գրիգորյանը:
Ապա հիշեցրեց այս տարվա ընդունելության նորույթի մասին՝ մեկ բուհ, մեկ մասնագիտություն. «Մրցույթի հիմնական փուլում շեշտը դրվում է մասնագիտական կողմնորոշման վրա, իսկ լրացուցիչ փուլում կարևորվում են բարձր գնահատականները»:
Խաչանուշ Գրիգորյանը նաեւ հավելեց, որ երկրորդ լրացուցիչ փուլի մրցույթի արդյունքները հրապարակվելու են հուլիսի 30-ին: «Այս դեպքում փոքր-ինչ տարբեր է մոտեցումը: Ինչպես նշվեց, մրցույթի առաջին փուլում կարեւորվում է մասնագիտական կողմնորոշումը, եւ հենց դա է այս տարի շեշտվել, որ օրինակ պատմության ուսուցիչ դառնալ ցանկացողը դուրս չմղվի մրցույթում իրավաբանականի մրցույթից դուրս մնացողի կողմից, եթե ավելի բարձր միավորներ է հավաքել:
Կարդացեք նաև
Այսինքն` մարդիկ պետք է հնարավորություն ունենան ընդունվել իրենց նախընտրած մասնագիտությամբ: Բնականաբար այս դեպքում հնարավոր է, որ մրցույթից դուրս մնացածները բարձր միավորներ ստացած լինեին, դրա համար մրցույթի երկրորդ փուլը թափուր տեղերը համալրելու համար այլ սկզբունքով է կառուցվում` ըստ միավորների:
Ըստ հայտերի հերթականության սկզբում նույն մասնագիտության անվճար մրցույթին են մասնակցում, եթե անվճար տեղեր կան, հետո վճարովի: Եթե առաջին հայտնի մասնագիտությամբ դիմորդը չի ընդունվում, հերթով հաջորդին է մասնակցում, այդպես մինչեւ վեցերորդը, մինչեւ թափուր տեղերը կլրացվեն: Երբ ամփոփվեն մրցույթի հիմնական փուլի արդյունքները, բուհերը կներկայացնեն թափուր տեղերի ցանկը, եւ ըստ այդմ, դիմորդները կարող են կողմնորոշվել` ինչ մասնագիտություններով դիմել»,-ասաց ԳԹԿ մամուլի պատասխանատուն:
Գոհար ՀԱԿՈԲՅԱՆ
