«Անգամ եթե նա մասնագիտությամբ իրավաբան չլիներ, պարտավոր էր գալ նիստին։ Խոսքը նման մարմնի առաջ հաշվետու լինելու մասին է։ Երբ 2013թ․-ին ես որպես ՄԻՊ գրասենյակի ներկայացուցիչ՝ դիմել էի ՍԴ, որ վիճարկեինք կառավարության որոշումը, այդ ժամանակվա կրթության նախարարն Արմեն Աշոտյանն էր ու նա եկել էր ՍԴ նիստին։ Մեկ այլ դեպքում մեկ այլ հարց վիճարկելիս այդ ժամանակվա նախարար Արտեմ Ասատրյանը եկել էր»,-սահմանադրական դատարանում այսօր «Հայաստան» դաշինքի դիմումի բանավոր քննության ժամանակ լրագրողների հետ ճեպազրույցում անդրադառնալով այն փաստին, որ պատասխանող կողմերից առողջապահության նախարար Անահիտ Ավանեսյանը ներկա չէ, փոխարենը նախարարությունից այլ պաշտոնյաներ են եկել՝ ասաց դիմումատու կողմի ներկայացուցիչ Արամ Վարդեւանյանը։
Հիշեցնենք, որ Սահմանադրական դատարանն այսօր բանավոր ընթացակարգով սկսել է քննել ՀՀ ԱԺ պատգամավորների ընդհանուր թվի առնվազն 1/5-րդի դիմումի հիման վրա՝ «ՀՀ բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության եւ ՀՀ առողջապահության նախարարի 2021թ․ օգոստոսի 20-ի N 65 հրամանի՝ Սահմանադրությանը համապատասխանության հարցը որոշելու վերաբերյալ գործը։
Հիշեցնենք՝ «Հայաստան» դաշինքն ավելի վաղ հայտարարել էր, դիմելու է ՍԴ՝ վիճարկելով առողջապահության նախարարի այն հրամանի՝ սահմանադրությանը համապատասխանելու հարցը, համաձայն որի՝ հանրային աշխատողները կամ պետք է պատվաստվեն կորոնավիրուսի դեմ, կամ 14 օրը մեկ ներկայացնեն ՊՇՌ թեստի բացասական պատասխան։
Կարդացեք նաև
Արամ Վարդեւանյանի խոսքով՝ վիճարկվող հրամանն ընդունել է մեկ մարդ․ «Եվ այդ մեկ մարդն Անահիտ Ավանեսյանն է։ Այդ խայտառակ հրամանը մեկ մարդու կողմից է ընդունվել։ Խնդիրն էլ հենց այդ է, որ մեկ մարդը չի կարող հրամանով որոշել նման ծավալի հարցերի վերաբերող խնդիր։ Այդ հրամանը հակասահմանադրական է եւ իրավունքի հետ առնչություն չունի»։
Նկատառմանն ի պատասխան, որ Անահիտ Ավանեսյանն այսօր կառավարության նիստին էր մասնակցում, Վարդեւանյանը նշեց, որ գործադիրի նիստին նաեւ փոխնախարարները կարող էին ներկա լինել։
Լուիզա ՍՈՒՔԻԱՍՅԱՆ
