Բերքաբերի հիմնական դպրոցում կա ջեռուցման համակարգ, սակայն գյուղում չկա գազ և հնարավոր չի լինում համակարգն աշխատեցնել:
Մեզ հետ զրույցում դպրոցի տնօրեն Գայանե Խուդավերդյանը նշեց, որ 2013 թվականին, երբ կառուցվել է դպրոցը, տեղադրվել է նաև լոկալ ջեռուցման համակարգ, որը, սակայն, հնարավոր չէ գործարկել, քանի որ գյուղում դեռ գազ չկա:
«Այսօր մենք դպրոցը օդորակիչներով և էլեկտրաջեռուցիչներով ենք տաքացնում:
Ջեռուցման համակարգը դպրոցում Համահայկական հիմնադրամի ֆինանսավորմամբ է իրականացվել, իսկ այսօր դպրոցում շահագործվող էլեկտրաջեռուցիչները տարբեր տեղերից ենք ձեռք բերել, քանի որ 57 աշակերտ ունեցող մեր դպրոցը բյուջե չունի և չունի հնարավորություն ինքնուրույն լուծելու այդ հարցը»,- նշեց Խուդավերդյանը:
Կարդացեք նաև
Տնօրենը նաև անդրադարձավ կորոնավիրուսային համաճարակի պայմաններում դպրոցում իրականացվող աշխատանքներին նշեց, որ նոյեմբերի 12-ից հետո դպրոցում շատ մեծ ալիք բարձրացավ COVID19-ի, որի պատճառով իրենք ստիպված եղան անցնել նորից հեռավար ուսուցման․ «Դպրոցում 15 ուսուցչից 7- ը միանգամից հիվանդացան կորոնավիրուսով, սակայն արդեն նորից անցել ենք նորմալ ուսուցման համակարգի, միայն մեկ ուսուցիչ ունենք հիվանդ»:
Խուդավերդյանը նշեց, որ դպրոցում մի մասն արդեն ստացել է ամբողջական պատվաստման չափաբաժին, իսկ մի մասը ստացել է միայն առաջին մասը , իսկ երկրորդ մասի համար պետք է սպասել, քանի որ նոր են վարակվել կորոնավիրուսով և դեռ չեն կարող պատվաստվել:
Սաթենիկ ՀՈՎՍԵՓՅԱՆ