«Կա համակարգային անուշադրության և չիմացության խնդիր: Ով շատ գիտի, շատ է վերահսկում»,- Հանրային լրագրության ակումբի կազմակերպած «ԵՄ-Հայաստան Համապարփակ և ընդլայնված համագործակցության համաձայնագրի» շուրջ՝ «Համաձայնագրի կատարման ընթացքի գնահատում և վերլուծում» խորագրով քննարկման ընթացքում հայտարարեց Անձնական տվյալների պաշտպանության գործակալության պետ Գևորգ Հայրապետյանը:
Քննարկումը կազմակերպվեց «ՀՀ-ԵՄ Համապարփակ և ընդլայնված գործընկերության համաձայնագրի (ՀԸԳՀ) իրականացման քաղաքացիական հասարակության համատեղ մշտադիտարկումն ու ջատագովությունը` հանուն Հայաստանում վստահելի և համակարգային բարեփոխումների» ծրագրի շրջանակում՝ Բաց հասարակության հիմնադրամներ-Հայաստանի աջակցությամբ:
Գևորգ Հայրապետյանը տեղեկացրեց, որ, օրինակ, Ֆեյսբուքում, կա գաղտնիության քաղաքականություն, որտեղ կան բոլոր ռեժիմները, թե, օրինակ՝ ինչպես է պետք ֆեյսբուքյան պաշտպանության կարգավորումներն անել՝ ամենապարզից սկսած, վերջացրած շատ ավելի խորը պաշտպանություն: Ըստ Գևորգ Հայրապետյանի՝ այլ բան է, որ մինչև խնդրի առաջ չենք կանգնում, չենք անդրադառնում այդ հարցերին. «Կա համակարգային անուշադրության և չիմացության խնդիր: Ով շատ գիտի, շատ է վերահսկում: Օրենսդրություն կա. անձնական տվյալների պաշտպանության մասին օրենքը հստակ սահմանում է, որ անձնական տվյալների տեղեկատվական համակարգում անօրինական միջամտություն լինելու դեպքում տվյալներ մշակողը պարտավոր է այդ մասին եռօրյա ժամկետում տեղեկացնել ոստիկանությանը, անձնական տվյալների լիազոր մարմնին և նաև հայտարարություն տարածել այդ մասին: Կարող ենք ենթադրել ողջամտորեն, որ տվյալներն օգտագործվում են իներցիայով»:
Գևորգ Հայրապետյանն ասաց՝ գործակալությունը վերահսկողություն է իրականացնում անձնական տվյալների ցանկացած մշակման հարցով. «Չի կարող լինել երաշխիք, որ ինչ-որ մեկը չի անի խախտում, որ անձնական տվյալները չեն մշակվի ապօրինի: Չի կարող նման երաշխիք լինել: Պիտի լինեն կառուցակարգեր, որոնք նախատեսված են դրանք կանխելու համար, ինչպես նաև այդպիսի խախտումների դեպքում պատժելու համար»:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
