Մոսկվայի և Բաքվի միջև ստորագրված պայմանագիրը որևէ խնդիր չի ստեղծում Հայաստանի հետ Ռուսաստանի դաշնային հարաբերությունների համար: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Մենք կհետևենք Երևանի հանդեպ ստանձնած մեր պարտավորություններին, որը մեր հին և մոտ դաշնակիցն է: Մեր համոզմամբ՝ Բաքվի հետ հիշատակված հռչակագրի ստորագրումը թույլ կտա ամրապնդել Հայաստանի, Ադրբեջանի և Ռուսաստանի միջև եռակողմ գործակցությունը»,- ասել է Զախարովան:
Նա հավելել է, որ հաշվի առնելով փոփոխված աշխարհաքաղաքական իրողությունները տարածաշրջանում՝ Ռուսաստանը մշտապես թարմացնում է երկկողմ պայմանագրային-իրավական բազան Հայաստանի հետ, որն այս պահին ներառում է մոտ 200 փաստաթուղթ:
Զախարովան նշել է, որ Ռուսաստանի և Ադրբեջանի նախագահների ստորագրած փաստաթուղթը ուղղված է տարածաշրջանային անվտանգության ամրապնդմանը:
Կարդացեք նաև
«Ինչ վերաբերում է ղարաբաղյան և հայ-ադրբեջանական հարաբերությունների կարգավորմանը, Ադրբեջանի հետ միութենական հարաբերությունների մասին հռչակագրում կա կետ այն մասին, որ կողմերը փոխադարձ կերպով կնպաստեն Ադրբեջանի, Հայաստանի և Ռուսաստանի առաջնորդների՝ 2020թ. նոյեմբերի 9-ի և 2021թ. հունվարի 11-ի ու նոյեմբերի 26-ի պայմանավորվածությունների դրույթների իրականացման ջանքերին»,- ասել է Զախարովան:
Պատրաստեց Վիկտորյա ԱՆԴՐԵԱՍՅԱՆԸ
