«Ես հավանում եմ այն միտքը, որ բոլոր պատերազմները տարբեր են: Դա է իմ ասածը»,-Aravot.am-ի հետ զրույցում ասաց Ժուռնալիստների «Ասպարեզ» ակումբ հասարակական կազմակերպության խորհրդի նախագահ Լեւոն Բարսեղյանը:
Լեւոն Բարսեղյան
Հիշեցնենք՝ Լևոն Բարսեղյանի կողմից հայկական ծագումով ուկրաինաբնակ մի կնոջ գրառումը ֆեյսբուքում հավանելը քննադատության պատճառ է դարձել:
Արմինե Ղազարյան անվանմամբ ուկրաինաբնակ հայ կինը գրել է, թե պետք չէ համեմատել Ուկրաինայի և արցախյան 44-օրյա պատերազմները: Նա նշել է. «Համեմատել ուկրաինական հզոր ենթակառուցվածքներ ունեցող միլիոնանոց քաղաքների ավերածությունները Արցախի 20.000-անոց բնակիչներով և 2 փոքր քաղաքների ռմբակոծությունների և ավերածությունների հետ բոլորովին տեղին չէ: Էստեղ մի բարձրահարկ շենքում ապրում է մի Ստեփանակերտի չափ մարդ…»:
Օգտատերերից մեկը, քննադատելով Լևոն Բարսեղյանին, գրել է. «Բայց օրինակ՝ էս ուկրաինուհու մտքի հետ համաձայն է նաև, չգիտես ինչու իրավապաշտպան համարվող, Լևոն Բարսեղյանը։ Իր սիրտն էլ է Ուկրաինայի համար ցավում, իսկ Արցախի քաղաքները դե փոքր բաներ են, էդ հեչ…»:
Կարդացեք նաև
Լևոն Բարսեղյանին հարցրինք՝ իր «հավանումը» նշանակում է, որ ի՞նքն էլ է այն կարծիքին, ինչ կարծիք ունի այդ ուկրաինաբնակ հայ կինը, իրեն ճի՞շտ են հասկացել, նա արձագանքեց. «Ոնց հասկացել են, ղուրբան իրենց: Ես նկատի ունեմ, որ բոլոր կոնֆլիկտները սպեցիֆիկ են, տարբերություններ կան: Աղջիկը նկուղում նստած ռմբակոծությունների տակ բան է գրել, ես էլ ասել եմ, մտածել եմ, մի խոսքով… թող դիմեն դատախազություն: Անեկդոտ հո չե՞նք: Ես հիմա պիտի նստեմ լայքը մեկնաբանե՞մ»:
Մեր հստակեցմանը՝ ի վերջո իր դիրքորոշումն այս հարցով ո՞րն է, Լևոն Բարսեղյանը պատասխանեց. «Հոդված ունեմ իմ էջում դրած, իմ դիրքորոշումն այնտեղ հստակ դրված է: Խնդրում եմ՝ բացեք իմ էջը ու կարդացեք, կլինի՞»:
Տաթև ՀԱՐՈՒԹՅՈՒՆՅԱՆ
