Կուսկուսը մանրաձավարից (манная крупа) պատրաստված մթերք է, որը շատ տարածված է հատկապես Միջին Արեւելքում, արաբական երկրներում: Այն փոխարինում է բրնձին եւ մակարոնեղենին՝ որպես խավարտ: Այս ուտեստը շատ հարմար է ինչպես պահք պահողների, այնպես էլ՝ վեգանների համար: Ի դեպ, կարող եք կուսկուսը փոխարինել նաեւ մանր աղացած ձավարով՝ մանր բլղուրով:
Անհրաժեշտ մթերքները
Կուսկուս- 1 բաժակ
Սունկ-700-800 գրամ
Կարդացեք նաև
Սպանախ- 1 կապ
Գլուխ սոխ-1 խոշոր գլուխ
Սխտոր-3 պճեղ
Բուսական յուղ- 4-5 ճաշի գդալ
Ձիթապտղի յուղ աղցանների համար (extra virgin) – 2-3 ճաշի գդալ (պարտադիր չէ)
Թարմ կանաչեղեն, սեւ, կարմիր պղպեղ եւ աղ՝ ձեր ճաշակով
Պատրաստման եղանակը
Բոլոր բանջարեղենները, կանաչիները լավ լվանալ, չորացնել: Սկզբում բուսական յուղի մեջ տապակել սոխը, ապա՝ սխտորը եւ սունկը: Մեծ թասի մեջ լցնել կուսկուսը, վրան լցնել եռման ջուր՝ այնքան, որ ծածկի կուսկուսը եւ մեկ մատ էլ ավելին լինի: Վրան ծածկել կամ կափարիչով կամ սննդային թաղանթով:
Երկու-երեք րոպե անց, երբ կուսկուսն ամբողջությամբ կլանած կլինի ջուրը, ավելացրեք տապակած սունկը, ձիթապտղի յուղը, թարմ կանաչիները, աղը, պղպեղը: Սնկի թավայի մեջ արագ՝ 2-3 րոպեում տապակեք նաեւ սպանախը եւ ավելացրեք կուսկուսին: Կարող եք մատուցել ինչպես տաք վիճակում՝ որպես խավարտ կամ հիմնական ուտեստ, այնպես էլ սառած վիճակում՝ որպես աղցան:
Պատրաստման մանրամասները՝ տեսանյութում:
Պատրաստեց Մելանյա ԲԱՐՍԵՂՅԱՆԸ
