«Երկու կողմերի տեսակետներում նմանություններ կան քարոզչական ռազմաճակատում։ Մի կողմն այդքան էլ լավ չի պատկերացնում, թե ինչ է կատարվում կամ փորձում է մոլորության մեջ գցել իր քաղաքացիներին»,-«Հենարան» մամուլի ակումբում լրագրողների հետ հանդիպմանն այսօր անդրադառնալով ռուս-ուկրաինական պատերազմի քարոզչական առանձնահատկություններին՝ ասաց մեդիափորձագետ Տիգրան Քոչարյանը։
Նրա խոսքով՝ եթե քարտեզին նայենք, ապա այնքան էլ լավ վիճակ չի Ուկրաինայի համար, թեեւ որոշել են մինչեւ վերջ կռվել․ «Երեւի իրենց մոտ էլ է «նոր Սարդարապատ»։ Իսկ ԶԼՄ-ներից տպավորություն է, որ այնտեղ է թափանցել «արծրունիզմը»։ Հայտարարություններ են արվում, որոնք իրականության հետ կապ չունեն եւ մոլորության մեջ են գցում ժողովրդին։ Դրանից չի խուսափում նաեւ ռուսական կողմը, բայց մի բան է հարձակողական քարոզչությունը, մեկ այլ բան՝ պաշտպանողականը»։
Փորձագետը շեշտեց, որ այս ամենը շոշափում է նաեւ հայերին եւ ՀՀ-ին․ «Մեր համայնքը մեծ է եւ կազմակերպված, մեծ ձեռքբերումներ ունի։ Շատ բողոքներ կան դեսպանատան աշխատանքից, ավելի ճիշտ՝ «չաշխատանքից»։ Հիմնական բեռը դրված է Ուկրաինայի հայերի միության վրա։ Իրենք են փորձում իրենցով հարցերը լուծել եւ դեսպանատնից քիչ օժանդակություն ունեն․ մեր դեսպանն ավելի շատ քաղաքական պաշտոն է, եւ նա պիտանի չի այլ բանի, քան քաղաքականությամբ զբաղվելը, եւ նրանից սպասելիք ունենալն արդարացի չէ»։
Հիշեցնենք՝ օրերս ԱԳ նախարար Արարատ Միրզոյանն ԱԺ ամբիոնից վստահեցրել է, որ Ուկրաինայում ՀՀ դեսպանությունն աշխատում է ծանրաբեռնված, որ պայմաններ են ստեղծել՝ Ուկրաինայի արեւմտյան սահմանակից երկրներ հայերի տեղափոխման համար։
Կարդացեք նաև
Լուիզա ՍՈՒՔԻԱՍՅԱՆ
