«Միջազգային շուկայում դիզվառելիքի եւ պարարտանյութերի գների աննախադեպ աճ կա, ինչն ազդելու է հայաստանյան գյուղատնտեսների վրա։ Ի՞նչ միջոցառումներով է մարդկանց բեռը թեթեւացվելու»,-ԱԺ-կառավարություն հարցուպատասխանի ժամանակ այսօր էկոնոմիկայի նախարար Վահան Քերոբյանից հետաքրքրվեց «Քաղաքացիական պայմանագիր» խմբակցության պատգամավոր Արմեն Խաչատրյանը։
Վահան Քերոբյանը նախ նշեց, որ երկու շաբաթ առաջ կառավարությունն ընդունել է պարարտանյութի սուբսիդավորման ծրագիրը, որով ազոտական, կալիումական, ֆոսֆատային պարարտանյութերի գների 50%-ը սուբսիդավորվում է, բայց ոչ ավելի, քան 9000 դրամը․ «Բոլոր համայնքներում պահանջարկն արդեն կա, հայտերը տրվել են մատակարարներին։ Գործընթացը սահուն է։ Իհարկե, գներն ավելի շատ են որոշ դեպքերում, բայց ընդհանուր առմամբ, կարծում եմ, կառավարությունն ամեն ինչ արել է, որ էժան գնով հասնի գյուղացուն։ Սահմանափակում կա՝ երեք հեկտար, որովհետեւ ավելի մեծ չափի հող ունեցողների դեպքում արտադրողականությունը բարձր է, եւ անգամ պարարտանյութի բարձր գնի դեպքում արտադրանքի գնի աճն աննշան կլինի»։
Վահան Քերոբյանի խոսքով՝ այն ավել գումարը, որը խոշոր ֆերմերները ծախսելու են պարարտանյութի եւ դիզվառելիքի համար, վաճառքի փուլում ամբողջությամբ եւ ավելի կփոխհատուցվի, եւ կլինի եկամտաբեր գյուղատնտեսական տարի։ Հիշեցնենք՝ օրերս ԱԺ-ում տեղի ունեցած քննարկման ժամանակ ֆերմերներից մեկն իշխանություններին անվանեց «մուտիլովչիկ»՝ ասելով, որ նշյալ սահմանափակումների պատճառով ֆերմերները դիմում են փաստաթղթեր կեղծելուն, որ կարողանան օգտվել սուբսիդիայից։
Ինչ վերաբերում է դիզվառելիքին, Վահան Քերոբյանը տեղեկացրեց, որ առանձին ծրագիր չկա, թեեւ կառավարությունն ունի գյուղատնտեսության աջակցության ծրագրեր։ Պատգամավորը շեշտեց՝ գյուղացիների մտահոգությունն այն է, որ պարարտանյութը ժամանակին տեղ հասնի։ Նախարարը պատասխանեց՝ ուշադիր հետեւում են, որ գյուղատնտեսական սեզոնի սկզբում պարարտանյութի խնդիր չլինի․ «Ժամանակին տեղ կհասնի»։
Կարդացեք նաև
Լուիզա ՍՈՒՔԻԱՍՅԱՆ
