Գեղարքունիքի մարզի Ծովագյուղ համայնքի մոտ հազար բնակիչներ այսօր փակել են Սեւան-Դիլիջան մայրուղին՝ բողոքելով համայնքների խոշորացման դեմ։ Այս առիթով այսօր ԱԺ-կառավարություն հարցուպատասխանի ժամանակ տարածքային կառավարման եւ ենթակառուցվածքների նախարար Գնել Սանոսյանն ասաց, որ իրավիճակից տեղյակ է․ «Ծովագյուղի եւ Սեմյոնովկայի բնակիչներին խնդրում եմ բացել ճանապարհը, գնալ իրենց աշխատանքին։ Երբ առավոտ իմացանք մտադրության մասին, առաջարկել ենք իրենց, որ սա ճանապարհին քննարկելու բան չէ, ուստի առաջարկել ենք աշխատանքային խումբ ստեղծել։ Կուզեն՝ մենք կգնանք գյուղ, կուզեն՝ Երեւանում կամ մարզպետարանում ցանկացած տեղ կարող ենք հանդիպել ու քննարկել»։
Սանոսյանը բացատրեց, թե որն է բնակիչների դժգոհությունը․ «Ինձանից էլ են բողոքում։ Ասում են՝ երբ ես մարզպետ էի, իրենք պետք է միայն Սեմյոնովկային միանային, իսկ երբ դարձա նախարար՝ իրենց միացնում են Սեւանին․․․սա իմ անձով չի պայմանավորված, ոչ էլ պաշտոնով։ Խոշորացման գործընթաց է»։ Նախարարի խոսքով՝ խտրական վերաբերմունք չկա, պարզապես համայնքների ավելի խոշոր միավորումներ ստեղծելու տարբերակն են ընտրել․ «Փորձը ցույց է տալիս, որ խոշոր միավորներն են իրենց արդարացնում։ Ծովագյուղի բնակիչների մտահոգությունը, թե իրենց համար ծախսվելիք գումարները ծախսվելու են Սեւանում, այդպես չէ։ Հակառակը, խոշորացման արդյունքում գումարներն ավելանալու են։ Համայնքը չի տուժելու»։
Լուիզա ՍՈՒՔԻԱՍՅԱՆ
