2021թ․-ի ընթացքում կոռուպցիոն բնույթի հանցագործությունների կատարման համար քրեական հետապնդում է իրականացվել 1698 անձի հանդեպ։ Թիվը սրա նախորդ տարվա ցուցանիշից 300-ով ավելի է։ Այս մասին այսօր ԱԺ պետաիրավական հարցերի հանձնաժողովի նիստում ՀՀ դատախազության 2021թ․-ի գործունեության մասին տարեկան հաղորդման զեկուցման ժամանակ հայտարարեց ՀՀ գլխավոր դատախազ Արթուր Դավթյանը։ Նա տեղեկացրեց, որ այդ անձանցից մոտ 600-ը հանդիսացել են պաշտոնատար անձինք։
«Տարվա ընթացքում հաջողվել է քննությունն ավարտել եւ դատի տալ մոտ 433 անձի՝ կոռուպցիոն հանցագործություններ կատարելու համար։ Տարվա ավարտի դրությամբ ընթացիկ քրեական գործերով բացահայտված՝ պետությանը պատճառված վնասը կազմել է 443 միլիարդ դրամ։ Միայն նախորդ տարվա ընթացքում փաստացի քննության փուլում վերականգնվել է յոթ միլիարդ դրամի վնաս։ Այստեղ նշեմ, որ այս քրեական գործերի մեծամասնությունն արդեն երկար ժամանակ քննվել է։ Ակնհայտ է, որ պետությանը պատճառած վնասի հաշվարկը, դրա պարզումը, ապացուցողական հիմնավորումը ժամանակատար են եւ պայմանավորված են նաեւ փորձաքննությունների նշանակմամբ, ուստի դեռեւս մեկ տարի առաջ հարուցված քրեական գործերով արդյունքը տեսնում ենք ավելի ուշ։ Իսկ այս տարվա առաջին եռամսյակում արդեն ունենք 13 միլիարդ դրամի պետությանը պատճառված վնասի վերականգնում։ Սա վկայում է, որ ավելի վաղ հարուցված քրեական գործերը մոտենում են հանգուցալուծմանը»,-շեշտեց Դավթյանը։
Նա վստահեցրեց, որ կոռուպցիայի դեմ պայքարը դատախազության համար շարունակել է մնալ ավանդական առաջնահերթություն։
Կարդացեք նաև
Լուիզա ՍՈՒՔԻԱՍՅԱՆ
