«Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանի օգնականի՝ Արամ Գրիգորյանի տանն այս պահին իրավապահները խուզարկություն են իրականացնում։
Արամ Գրիգորյանը ՊՊԾ նախկին աշխատակից է, խուզարկության ընթացքում նա բնակարանում է։ «Խուզարկության որոշմանը ծանոթացել եմ։ Խնդիրը վերաբերում է այն հայտնի տեսագրությանը, որում Արամը մուրացկաններին փող է բաժանում ձմռանը»,-MEdiaHub.am-ի ուղիղ եթերում հայտարարեց Արամ Գրիգորյանի շահերի ներկայացուցիչ, փաստաբան Երվանդ Վարոսյանը։
Հիշեցնենք՝ վերջերս համացանցում տեսանյութ էր տարածվել «Վանեցյանի օգնականը փող է բաժանում» վերտառությամբ։ Արթուր Վանեցյանն ապրիլի 23-ին հերքել էր տեղեկությունը, թե հավաքների գալու համար իրենք գումար են տվել քաղաքացիներին․ «Հերթական հիմարությունն է։ Ուշադիր նայեք, ձմեռվա տեսանյութ է, հագուստին նայեք։ Եթե չեմ սխալվում, Սիրահարների այգու շրջակայքում է եղել։ Մուրացող մարդիկ են եղել, օգնականս օգնել է, փող է տվել»։
«Հայրենիք» կուսակցության անդամ Արսեն Բաբայանը խուզարկության հետ կապված այսօր հետեւյալ գրառումն է արել․ «Իշխանությունն այդպես էլ չհասկացավ, որ քրեական քողի տակ թաքնվելով քաղաքական հետապնդումները մեզ չեն կարող վախեցնել: Իշխանությունն այդպես էլ չհասկացավ, որ մենք անգամ բուն թուրքից չենք վախեցել ու վախենում, էլ ուր մնաց թուրքի կամակատարներից վախենանք կամ նահանջենք»։
Կարդացեք նաև
ԹԱՐՄԱՑՈՒՄ․ 14:00-ին Արամ Գրիգորյանին տարան ոստիկանություն։
Լուիզա ՍՈՒՔԻԱՍՅԱՆ
