Ռուսաստանցի քաղաքագետ, Միջազգային հարաբերությունների Մոսկվայի պետական ինստիտուտի (MGIMO) առաջատար հետազոտող Սերգեյ Մարկեդոնովն Արցախի հարցում արեւմտյան քաղաքական գործիչների հռետորաբանությունից այնպիսի տպավորություն է ստացել, որ Ռուսաստանն առհասարակ այդ գործընթացում մասնակցություն չի ունեցել: Ավելին, ըստ Սերգեյ Մարկեդոնովի, Արեւմուտքը դադարել է Ռուսաստանի հետ համագործակցել հայ-ադրբեջանական կարգավորման եւ Արցախի հիմնախնդրի կարգավորման գործընթացում: Իր տպավորությունները քաղաքագետը բարձրաձայնեց այսօր Երեւանում կազմակերպված գիտաժողովի ժամանակ, որում քննարկվող թեմաներից մեկն էլ Հարավային Կովկասում ՌԴ-ի եւ Արեւմուտքի առճակատման հավանականությունն է:
Պատմական փոքր անդրադարձով Սերգեյ Մարկեդոնովը հիշեցրեց, որ արցախյան հարցի կարգավորման գործընթացը միշտ եւ էապես տարբերվել է այդ թվում նաեւ հետխորհրդային տարածքի հակամարտություններից։ Եվ դա է եղել պատճառը, որ Արցախի հարցով Ռուսաստանն ու Արեւմուտքը միշտ համագործակցել են:
Անդրադառնալով կարգավորման ներկայիս փուլին, մասնավորապես, ԵՄ հովանու ներքո ընթացող հանդիպումներին, քաղաքագետը պարադոքս որակեց այն առումով, որ Մոսկվան չի հերքում Շառլ Միշելի հայտարարությունները։ Խնդիրը նա համարում է այն, որ նախկինում, այսպես կոչված, առաջին ջութակի դերը Մոսկվայինն էր։ ԵՄ հովանու ներքո ընթացող գործընթացում, բանախոսը մեկ էական առանձնահատկություն է ընդգծում՝ «տպավորություն է ստեղծվում, որ Ռուսաստանն ընդհանրապես չի եղել եւ չկա բանակցություններում», մինչդեռ, իր գնահատմամբ, հարցի կարգավորման գործընթացում, ՌԴ-ն առավել շատ գաղափարներ ունի:
Հայաստանի եւ Արցախի շուրջ իրավիճակի հնարավոր զարգացումները քաղաքագետը պայմանավորում է տարածաշրջանում զարգացումների դինամիկայով: Մասնավորապես, Սիրայի հարցում ՌԴ-ի եւ Թուրքիայի պայմանավորվածություններով: Նա կարեւոր է համարում, որ Ռուսաստանն ու Թուրքիան ուղղակի հակամարտության մեջ չմտնեն: Բայց նման առճակատման պարագայում, համոզված է՝ Արևմուտքը կսատարի Թուրքիային՝ անկախ բազում այլ հացերում տարաձայնություններից։
Կարդացեք նաև
Նելլի ԳՐԻԳՈՐՅԱՆ
