ԵՊՀ ISTC կենտրոնում hայազգի անվանի գիտնական, գործարար, բարերար Նուբար Աֆեյանին շնորհվեց ԵՊՀ պատվավոր դոկտորի կոչում։ Նա նախ հանդես եկավ ելույթով, ապա պատասխանեց ուսանողների ու պրոֆեսորադասախոսական կազմի հարցերին:
Նուբար Աֆեյանն ասաց, որ շատ ուրախ է հյուրընկալվել համալսարանում, ապա ներկայացրեց իր անցած ճանապարհը, սեփական փորձը, անդրադարձավ ժամանակի մարտահրավերներին, գիտության եւ երեւակայության փոխհարաբերությանը:
Պատասխանելով Հայաստանում կրթական համակարգը սուղ միջոցներով զարգացնելու վերաբերյալ հարցին, Նուբար Աֆեյանը ժպտալով ասաց, որ պետք է կրկին դիմել երեւակայությանը: Փաստեց, որ դեռ չի տեսել մի երկիր, որը բավարար միջոցներ ունենա կրթական ոլորտը զարգացնելու համար` լինի Ռուսաստանը, Չինաստանը, թե Ամերիկան:
Նշեց, որ միշտ էլ ռեսուրսները չեն բավարարում, ուստի անհրաժեշտ է երկու բան` կամ եղած ռեսուրսներն ավելի արդյունավետ օգտագործել, կամ ռեսուրսներ աճեցնել. «Ռեսուրսներն աճեցնելու համար, պետք է տնտեսությունը աճեցնել, կամ դրսից պետք է օգնություն գա»: Նրա ձեւակերպմամբ, Հայաստանի պարագայում պետք է բոլոր ուղղություններով աշխատել եւ վստահ լինել հաջողության հասնելու մեջ: Նուբար Աֆեյանի ձեւակերպմամբ, Հայաստանում կրթությունը պետք է դիտարկվի որպես առաջնահերթություն, ամեն բան կախված է կրթության հաջողությունից:
Կարդացեք նաև
Մանրամասն` տեսանյութում
Անդրադարձ եղավ ԵՊՀ-ի միջազգային եւ գիտական համագործակցությանը, հայկական մտավոր ներուժի գեներացմանը եւ ընդհանրապես սփյուռքի ներուժին, խոսեց նաեւ տարբեր ոլորտներում իրականացված իրենց ուսումնասիրություններից: Անվանի գիտնականը նաեւ փաստեց, որ մեզանում հաճախ մեկը մյուսի գաղափարը չի ընդունում. «Ընդհանրապես հակառակություն կա մեր մեջ, մեկը մյուսի գաղափարը չի ընդունում…Շատ ավելի պատրաստ ենք օտարների գաղափարներն ընդունել…Նման բնավորության հարց կա, որի վրա պետք է աշխատել»:
Մանրամասն` տեսանյութում
Դասախոսներից մեկը հետաքրքրվում էր ԵՊՀ քիմիայի, կենսաբանության ֆակուլտետների եւ Աֆեյանի ղեկավարած կազմակերպության հետ համագործակցությամբ: Անվանի գիտնականն ասաց, որ լրիվ հնարավոր է այդ համագործակցությունը FAST-ի միջոցով, նաեւ առաջարկեց հավելյալ հանդիպել:
Նա խոսքի մեջ անընդհատ ընդգծում էր կրթության կարեւորությունը. «Կրթությունն է ապագայի մասին խոսելու կարեւոր նյութը…Ապագայի հիմքը, պոտենցիալի աճը կրթության մեջ է, իսկ ապագան կախված է կառավարության եւ մասնավորի գործակցությունից: Եթե այդ համագործակցությունը տեղի չունենա, վախենամ, որ կնմանվենք բոլոր այն երկրներին, որոնք փոքր են եւ բավարար ռեսուրսներ չունեն»:
Նուբար Աֆեյանը երազեց, որ երիտասարդները իրականացնեն իր ցանկությունը եւ մի օր նորից Հայաստանում հանդիպելիս ասի, որ երազն իրականացել է։
Մանրամասն տեսանյութում` քիչ անց.
Նշենք, որ Նուբար Աֆեյանը մասնակցել է կենսաբանական ուղղվածություն ունեցող գիտական և տեխնոլոգիական 20-ից ավելի հաստատությունների հիմնադրմանն ու կայացմանը, հանդես է եկել մարդասիրական նախաձեռնություններով, արժանացել է պետական պարգևների և մրցանակների։
Գոհար ՀԱԿՈԲՅԱՆ
