Aravot.am-ը ԿԳՄՍ նախարար Վահրամ Դումանյանից հետաքրքրվեց, թե ինչու ԿԳՄՍ նախարարությունը ուշացումով որոշեց արձագանքել Հատիս լեռան տարածքում Հիսուս Քրիստոսի արձանի տեղադրմանը:
«Հատիսի մասին կառավարության նիստում հնչեցվեց, բայց այս պահին ի՞նչ ասաց վարչապետը, ի՞նչ հնչեցվեց կառավարության նիստին, այն, որ գաղափարը դեռ պետք է ճանապարհ անցնի եւ փաստաթղթավորվի, դեռ խնդիրներ պետք է լուծվեն, եւ խնդիրների լուծումն ընթացքի մեջ է»,-ասաց նախարարը:
Հավելեց, որ այս պահին դեռեւս նախագիծ չկա, ԿԳՄՍՆ հայտարարության մեջ էլ հղումներ են արված գործող կարգերին, օրենքներին. «Հուսով ենք, որ հետագան կլինի կարգին համաձայն»:
Վահրամ Դումանյանն ասաց, որ Գագիկ Ծառուկյանի հետ Հիսուս Քրիստոսի արձանի տեղադրման հարցով երբեւէ չի հանդիպել, իրենք նախարարությանը չեն դիմել, պաշտոնական գրագրություն չի եղել:
Կարդացեք նաև
«Եթե ցանկացած քաղաքաշինական հարցով օրենքին դեմ գնան, լիազոր մարմինը, տվյալ դեպքում` մեր նախարարությունը կպահանջի խստորեն պահպանել կարգերը եւ հետեւել օրենսդրության պահանջներին»,-ասաց Վահրամ Դումանյանը:
Նախարարը կարծիք հայտնեց, որ լավ կլիներ, եթե Հայ առաքելական եկեղեցին ավելի հստակ դիրքորոշմամբ հանդես գար այս հարցում, ինչը նրա ձեւակերպմամբ, ոչ պակաս կարեւոր է, քան Հայոց եկեղեցու պատմություն առարկայի ժամաքանակը:
Արձանի մասին էլ շեշտեց. «Ես ոչ հիմքեր ունեմ ասելու, որ այդ արձանը պահանջված է, որ պետք է օր առաջ լինի, որ մեզ ավելի լավ զգանք, ոչ էլ հիմքեր ունեմ հերքելու, որ դա անթույլատրելի է, վատ է»:
Ինչ վերաբերվում է էսքիզին, նրա խոսքով. «Քրիստոսի վերաբերյալ բոլոր էսքիզներն էլ իրար նման են»:
Հիշեցնենք, որ Գերագույն հոգևոր խորհուրդն այս արձանի վերաբերյալ հանդես էր եկել հետևյալ հայտարարությամբ. «Գերագույն հոգևոր խորհուրդը բարձրորեն գնահատում է տիար Գագիկ Ծառուկյանի եկեղեցաշինական անուրանալի ծառայությունները, որոնցով նա մեծապես նպաստել է Եկեղեցու հոգևոր-քարոզչական առաքելության արդյունավորմանը: Միաժամանակ Եկեղեցին ընդունելի չի համարում մեր Տիրոջ՝ Հիսուս Քրիստոսի արձանի տեղադրումը՝ նկատի առնելով, որ այն հարիր չէ Հայ Եկեղեցու դարավոր պատկերագրական և պաշտամունքային ավանդույթին։
Եկեղեցու համար ընդունելի կարող է համարվել Փրկիչ մեր Տիրոջ հարթաքանդակի կառուցումը՝ «Ամենափրկիչ» խաչքարերի սկզբունքով:
Գերագույն հոգևոր խորհրդի հորդորն է նախաձեռնության հեղինակներին և մասնակիցներին՝ զերծ մնալ Հայաստանյայց Առաքելական Սուրբ Եկեղեցու ավանդույթին հակասող նախագծերից և առաջնորդվել մեր ազգային-եկեղեցական մշակույթին, եկեղեցաբանական և աստվածաբանական սկզբունքներին համահունչ մոտեցումներով»:
Գոհար ՀԱԿՈԲՅԱՆ
