Կառավարության այսօրվա նիստում ԲՀԿ առաջնորդ Գագիկ Ծառուկյանին պատկանող խաղատան փոխարեն 4.2 մլրդ դրամ պետական տուրքի գումար վճարելու մասին որոշման քննարկումից հետո վարչապետն անդրադարձավ նաեւ Ծառուկյանի նախաձեռնությանը՝ Հիսուսի արձանի կառուցմանն ու տեղադրմանը։
«Դուք գիտեք, որ «Մուլտի գրուպ» ընկերությունը հանդես է եկել նախաձեռնությամբ՝ Հատիս սարի վրա Հիսուս Քրիստոսի արձանի կառուցման վերաբերյալ եւ համապատասխան փաստաթղթերը ներկայացվել են կառավարություն: Մեր նախնական գնահատականը դրական է նախագծի վերաբերյալ, որովհետեւ կարծում ենք, որ ինքը զբոսաշրջային հետաքրքրությունը Հայաստանի համար բավական էական կմեծացնի: Հուսով եմ՝ համապատասխան մարմինները պատշաճ ժամկետներում հարցը կքննարկեն: Այնտեղ մի շարք վարչական որոշումների անհրաժեշտություն կա: Այդ որոշումները կկայացվեն եւ պրոցեսն ու նախագիծն առաջ կընթանա նախատեսված տրամաբանությամբ»,-ասաց Նիկոլ Փաշինյանը։
Հիշեցնենք, որ Գերագույն հոգևոր խորհուրդն այս արձանի վերաբերյալ հանդես էր եկել հետևյալ հայտարարությամբ. «Գերագույն հոգևոր խորհուրդը բարձրորեն գնահատում է տիար Գագիկ Ծառուկյանի եկեղեցաշինական անուրանալի ծառայությունները, որոնցով նա մեծապես նպաստել է Եկեղեցու հոգևոր-քարոզչական առաքելության արդյունավորմանը: Միաժամանակ Եկեղեցին ընդունելի չի համարում մեր Տիրոջ՝ Հիսուս Քրիստոսի արձանի տեղադրումը՝ նկատի առնելով, որ այն հարիր չէ Հայ Եկեղեցու դարավոր պատկերագրական և պաշտամունքային ավանդույթին։
Եկեղեցու համար ընդունելի կարող է համարվել Փրկիչ մեր Տիրոջ հարթաքանդակի կառուցումը՝ «Ամենափրկիչ» խաչքարերի սկզբունքով:
Կարդացեք նաև
Գերագույն հոգևոր խորհրդի հորդորն է նախաձեռնության հեղինակներին և մասնակիցներին՝ զերծ մնալ Հայաստանյայց Առաքելական Սուրբ Եկեղեցու ավանդույթին հակասող նախագծերից և առաջնորդվել մեր ազգային-եկեղեցական մշակույթին, եկեղեցաբանական և աստվածաբանական սկզբունքներին համահունչ մոտեցումներով»:
Նելլի ԲԱԲԱՅԱՆ